Гъийкьыд 38 сен лихъитхьур а Чернобыль шегьерди ад атомный станцияди авария вишид. Гьадире ихьды хуькийметес ки ва дайрады инсанашис ки бала кьухьды зиян-зарарбыр выри. Гьа гвалах вишид виъи 26-хьусды апрелес 1986 сыда. Гьа гедене гьазамды спасателер, пожарникер, атомный станциедид къуллухчиер ва гьа йераа бегеде гьаIсил дишид инсанар дыркьыри гьади мадана, радиация себеб йишир. Джандыла хыл лювшур, гьа авариядире выд зиян- зарарбыр арыди-джаргыди хъыгын бадана, дыхьыр ай гьадиъ, гьухьус йикиси, джегьеллемдид йыкьды худа, ихьды МыхаIд райондады инсанар ки. Сабыйды гьабишикла йиъи Абдуризаков Джават Таирович.
26-хьусды апрелед йыгъа Россияди агъмиш гьаъара «День участников ликвидации последствий радиационных аварий». Гьа йыгъа ЦЭВД-дид къуллухчиер, гьади кьылебыр гьаъара ад телебиер ва гьа идарадид кьухьды Кузиева Роза Абдуллаевна кьуле гине дыхьыр ай Джават Таировичихда хала.
Йыдкьыр салам сувгъуда хъуъ, хынимеше хуткун-суалбыр гьыъыри Джават-шудаа гьа авариядикла ва гьади инсанашы йидкьыд гьазабырмыкла, завалмыкла, гьади ад агьвалатмыкла. Джават гыгые дайраады ихтилатбыр гьыъыри хынимешис ва гьабишды магьаIлимешис гьагудыхъунды, йишидыхъунды гвалахмыкла.
Сиене хынимер убур хъихьир бытIрана хъадабцура ай Джават-шура гьыъыд ихтилатмыхда. Джуьхьды йикIяа гьабыр гетIкьыри, шууды йигитвалды выъыр ади гьадиъ йыхьыр, иштрак гьыъыр Джават-шура ва мадды гьадиъ дыхьыд инсанаше.Гьабишды гьунурдыхьван балад инсанар сагъна адгыр.
ЦЭВД-дид телебиер гьа йыгъырма каIчIур ай пай гьаъара мыхаIбишис ва мадды райондады инсанашис Георгиевский лентабыр. Гьадис гюре къумшиди ад Джават-шус сахьусды выр гьабише даIгъвиди гъалиб дишидид лента ва къутли выъыр гьанийис бегеде виъид байрам.
Хынимешихьан ва идарадид къуллухчийшихьан сытIа Джават-шуд гуьгьуьл лешус йиркьыр ай дур ад мыхаIбишды шаир Шафи Амсари ки.
Эккене рази йишир, балад сагъул-варулбыр гьыъыр Джавата мийманашис хъуIдид арыди.

Зарема Исрафилова