КIаъды отпускади хъиркьыр ай специальный военный операциедид иштракчи Магомедов Марат Метеевич, гьа арыди хаIсил йишир МыхаIбишды райондид кьухьнийхьван Сулейманов Давуд Амаевичехьван.
Кьиркьыд арыди Марат Метеевиче къутли гьыъыр райондид халкьдис Дагъыстанад cаваIлид Йыгъ. Гьание гьа байрам бала лазимдине гьасаб выъыри сиене дагъыстанабишис, гьухьур, савалдыыла бала ассыллы виъи республикадид лаъвалды на махкамвалды.
«Йе, увухуIре ихьды Ватан даIгьвие, гедыркьара, шудаъ лаазим виъиди йе гъалиб дишин бадана ихьды савалды, ари хизынди ки ва республикади ки», — гьухьур Марат Метеевиче.
Гьание гене ихтилатбыр гьыъыр, шууна чалыш диъиди ихьды эскерер даIгьвиди, джуды юлдашешды йигитваIликла гьалгыри, шууна джваIр сытIа, гаджадкъыр джетинвалдымыхда, кьуле гыргара ади сихьир ад задачабыр.
Районад кьухьние Сулейманов Давуд Амаевиче эккед сагъул-варулбыр гьъыъыр Марат Метеевичес, гьанийды йигитваIлис Ватан бадана гьувга ваъара ад. Гьание гьухьур, гъийгъа джетинды вахтинди бала лаазим виъи сасынийис хыл йывхыIн, куьмег вын, къисмат гьыъыр СВО-дид иштракчиес кIыб хала хъикьас ва сагъды джан.
ГьаIсил дишид арыдыы балад ихтилатбыр, гаIш-мыкьбыр гьыъыр гьабише ягъмишдишибишихьван сытIа. Районди инсанаше бала хуIрмет ваъара ихьды Россия ватан увухуIд даIгьвидид иштракчиес. Гьабише эккед алхышбыр гьыъыр Маратыс, джетинвалдымыда хырыда йиший, хьур.

Б. МЫХАIДЫ