Саласадид йыгъа, 13 октябрес, Дагъыстандид Правительствадид Седрие Магомед Рамазанова иштрак гьыъыр капитальный ремонт гьыъыдыла хъуъ ачых гьыъыд объектед магьра1ката – Сулак нац1уру ц1иненене хъывыъыд гъы1д рыкъы1к кид Кизилюрт — Дубки — Новый Чиркей ва Миатли мукъу1хда ки вуруъуд.Хьурагине премьер-министр выдж йыхьыр тааныш йишир ц1ине хъыъыр ад объектахьан.
Телемоста, выгыр ад «Дорога-2026»-хьур выставкадихьан, магьра1ката ц1инды ра1хъбыр ва объектбыр ачых гьаъара Дагъыстади, Чечниди ва Кабардино-Балкариеди иштрак гьыъыр ай Россиядид транспортад министред сахьусды заместителе Константин Пашкова ва Федеральный ры1къмыд агентствадид кьухьние Роман Новикова.
«Гъийгъа Россияди лап дирибашене дюз хъаъара а ра1хъ-кьул. Гъийгъа е ачых гьаъара а ц1инды объектбыр – гьамыд ма1хкамвалды на технологиябыр эккедбыр йиъи. Сахьусды гьунарвалды ихьды гвалахмыд – разивалды виъи инсанашды», – гьухьур Константин Пашкова.
Магомед Рамазанова выъыд хабардихьван, гъы1ла тиниъ вуруъура ачых ра1хъ Сулакский каньонахда, Старый Зубутлидыхда, «Главрыба» комплексахда ва мадды дур ад туристешды арыди ермыхда. Гьа объектере бала йыха ваъаси Дагъыстандид туристический инфраструктура ва ачых викиси ра1хъ Кизилюртовский ва Казбековский районбыр ари йыха1 гьаъад, гьухьур телемоста премьер-министре.
Хьурагине гьади гъай йисды йилагад гъа1 инсанар дирхьасды тратуарбыр адишне, юкьды машинбыр сигас джугъу1ре. Гьамыъ гьа джетинвалдыбыр мадиш. Гьадыла саваенди гыйгъа1с йикиси катермыда на к1аъды параходмыда ки.
Магомед Рамазанова сагъулбыр гьыъыр Россиядид транспортад Министерствадис ва Федеральный ры1къмыд агентствадис выд куьмгид ва сыт1а выгыд гвалахад бадана.
Телемоста хьуъ Россиядид транспортад сахьусды замминистре Константин Пашкова выр старт машинбыр сигас.
Гьа байрамад магьра1ката премьер-министре Магомед Рамазанова выри наградабыр гвалахбыр гьыъыд устарашис гъа1 ц1ине хъаваъади, гьади гвалахбыр йыгыд идарамыд кьухьдыбишис.
Дагъыстандид Правительствадид Седрие гене гьухьур, республикади ры1къмыд бадана мада гьала суалбыр, ягъа1д лазимды кьарарбыр. Рамазановад ч1елмыхьан, ха1р объектед гвалахбыр гьаса кьуле йыгыр йыгара, шууна бегьем йишир гюзет гьаъара ади республикадид инсанаше

Б. МЫХАIДЫ