Каспийскадид форумара экономика лаъ выгыргас куьмег выси
Юкьубхьусды Международный Каспийский цифровой форума иштрак гьаъад вахтинды, Дагъыстандид Кьухьные Федор Щукине ва мадды гьади иштрак гьаьас йидкьыр ад регъбереше джывабыр выр ай журналистеше выд суалмыс.
Щукине ихтилат гьыъыри шыв умудбыр гьаъара ади джу фуланды форума.
«Гъийгъа гьакъикъат байрамад йыгъ йиъи сиене Дагъыстандис. Е эккене рази диъи гъийгъа миди йидкьыр фуланды магьра1катди иштрак гьаъара а хьур балад инсанаше, гьа рухьуд ч1ел виъи гьабишис дерд анивиьи миди хьуъ гет1есды суалмыд. Гъийгъа гьемиди йидкьыр анидиъи ха1р джура ихьды ху1киметед регионмады мийманар ва ихьды Каспийский деръяхада гид къумшиди ад ху1киметмады инсанар», – гьухьури республикадид кьухьние.Федор Щукине генеки йик1ыы лихъийири шыв нетидже ади фуланды форумахда, сахьусды гьадид нетидже виъи лейихды кьарарбыр эгъет1ин, экономика лаъ гыргас куьмег высды.
РФ Президентед СКФО-ди замполпреде Владимир Надыктова ки джываб выр ай СМИ-мыд суалас, джуды фикирмаа шыв куьмег вылц1ади цифровизациедид сферадире дуьни-дуьнйадид экономика лаъ выгынис ва ху1киметмыд арыди ху1рмет къалин ваъас СКФО регионмыд примерахда гакдкъы1йне.
«Задаа джываб выс йикиси гьеми юкьасине за иштрак гьыъыд форуммыра выд хайирехда гакъыр. Балад ва йыхды суруу дегишвалды анивиъи гьа вахтинды йыгыд форумад на гъийгъадид арыди. Сен-сыдыла форума иштрак гьаъабыр бала диъи. Гъийгъа гьемиди са джигиди ягъмыш гьыъыр Прикаспийский зонади ад регионбыр ки ва Южный федеральный округа ад регионбыр», – гьухьури Надыктова.
Гьанийды ч1илмыхьван, умуд а 5-хьусды форума мааки балад регионмады инсанар ягъмиш дикис.
«Гьадире куьмег йикиси мааки хьуъ выгыргас ва ма1хкам ваъас цифровой гвалах, гьадыла саваенди экономика йыха ваъасды суалбыр ки кьуле гыргас раха1т гьаъаси. Зас гьакъийкъатана гьац1ара гъийгъад форум бегьем вишидыла хъуъ, гьадире эккед куьмег высди хьуъ выгыргас цифровой отраслидид гвалах», – гьухьури замполпреде.
Зарема Исрафилова