24-хьусды августас Махачкалди, Дом дружбадид зала, выгыр ай Дагъыстандид магьа1лимешды август вазыра выгыргад иджлас – сахьусды дур гъад магьра1кат 1-хьусды сентябред хьурагине вуруъуд. Гьади агъмиш гьыъыр ай гьаатхы1д сыда йыгыд кьылевыъынмыд гвалахбыр ва шыв гьыъыр йыгарди мистед ц1инды сыда.
Миди ягъмиш дишир ай магьа1лимер, мехьтебырмыд директорар, экспертер ва сиене республикади ад ведомствамыд кьухьдыбыр. Саламад ч1илихьван сахьусды гьади гьалгыри Дагъыстандид врио Кьухьды Федор Щукин.Иджласа гене иштрак гьыъыр ай РФ-дид ФС-дид Госдумадид кьылебырмыд Комитетед седриед заместителе Нурбаганд Нурбагандова ва Дагъыстандид Правительствадид Седрие Магомед Рамазанова.
Дом дружбадид гъаъна фойеди 18 предприятиемыра сихьир гьагва гьыъыр ай джва1р агъахара ад улесдыбыр, хьедбыр мехьтебырмыда хынимешис кывыс йикисды ва саки хынимеше дарсыма лаъасды валыгмар.
Джуды выступлениеди Федор Щукине гьухьур, регионад Правительствадире джат1ур кьабыл гьаъара а ха1рса джура кьарарбыр, куьмег высды магьа1лимешис. Сабыйды гьасад куьмег йиъи ц1инене садана выс хьур ад 150 гьагъзыр манутад выплата джигьил магьа1лимешис.
«Гьадыла саваенди е выгыргара а гвалах кьуле выгыргас хьур программа “Земский учитель”. Гъийгъад йыгъа е сидиргара а 30 магьа1лим мегьтебырма на ва мадды кьылебырмыд идарама. Ха1рнийис гьабишикла выси садана вылц1ад са миллионад выплата. Магьа1лимешис куьмег высды тангымыд суруула гвалах мидыла хъуъ ки е лувза джывыъыр выгыргаси.
Гене ихьды плынди а мехьтебырмыра дагъа1д, лазимды магьа1лимер гьазыр даъас, герексен институтбыр лат1уда джигьил магьа1лимешда дуруъус йикисне джва1р гюзет даъара ад мехьтебырма», – гьухьур Щукине.
Эккед доклад, шыв гвалахбыр гыргас ниятбыр ади 2026-2027 кьылевыъынид сыда, гьыъыри образованиедид ва наукадид врио министре Яхья Бучаева.
Августад иджласала хъуъ джубра хъуд йыгъырма йыгыр ай магьа1лимешды предметмыд, директорашды ва кьылебырмыд идрамыд кьухьдыбишды секциябыр Махачкалди не Каспийскади.

Б. МЫХАIДЫ