Дагъыстандид врио вице-премьер Муслим Телякавов джуды выдж йыхьыр гакьыр, шууна кьуле гыргара ади капитальный ремонт меркезди ад кьылевыъынмыд учрежденияма, балана зиянбыр выр ад бегедене йишид гьугълумыра. Сахьусды кьул убур йыхы1р ай №59 мехьтебес, №56 гимназиедис ва «Улыбка»-хьур хынимешды садикес.Социальный инфраструктура дюз-дюзгин хъывыъын - республикадид сахьусды месъэле виъи. Гъийгъад йыгъа йыхы1р Дагъыстанди усла хъыгыр а 51 кьылевыъынмыд объект, ва зиян-зарарбыр выд идрамыд ремонтас сиене районма регионад хазныда сигыр ай 53 миллионала балат манутбыр.
Инспекция выгыргади подрядчикеше ихтилат гьыъыр, шыв гвалахбыр гыргара ади ва гыргасды йиъиди. 59-хьусды мехьтебе не ва хынимешды садике. Чалыш диъи сахьусды кьул махкамна гьаъас фундаментбыр ва усла хъыгас аа-уу хад ма1хлебыр. №56 гимназиеди устараше дюз хъаъара а кьва1д спортад зал.
Объектмыхьан тааныш йишидыла хъуъ, Муслим Телякавова гвалахмыд плана гьыъыр ц1амды дегишвалдыбыр, гьагва гьыъыр йыгыр йыгад артухды гвалахбыр, кийисды капремонтад проектек. Вице-премьере гьухьур: ихьды бырдж йиъи махкамды гвалахмыд суалбыр лазим йиъид кал ва шууна ягъа1рди кьуле йыгын. Гьамыд джываб вылц1ад юлдашешда хайиш гьыъыр гьувга выъыр ад вахтиндихьан, ыхьа1 джыъыр сиене гвалахбыр кьуле гырга хьур ва ишлемиш гьаъ хьур юкьсура махкамды, балагема гукасды материалбыр, ц1ине хъыъыд зданиебыр балад сыдырмы ишлемиш гьаъас йикисне хынимешис.
Джураана убур йыхы1р ай врио вице-премьере безопасностед ва комфортад суалмыс гьади дележек кьыле ваъасды телебийшды. Муслим Телякавовад ч1елмыхьван, ремонт йишир йыгардиш уулахьуъды («косметический»), гьугълумыра зиянбыр выд джыгабыр ц1амна дюз хъыъыр - гьыъыр йыгара гъийгъад вахтиндире ягъа1д кал гьакьасабыр гвалахмыд еринды, гьамыъды кьылевыъынмыд стандартмыс лейихды.
Мидыла хъуъ гьа гвалахмы тааликьды ведомствабыр Махачкалдид администрациедыхьан сыт1а мааки лаазим йиъид кал балана макъыет йикис, гьамы мысга йикиси гьакь-сан. Ха1р ха1фтидис подрядчикеше хъывыс гвалахмыд отчет ва джываб выси, эгер писды материалбыр ишлемиш гьыъыхьна ва яки гвалахбыр хъуъ хъийихьна.
Гьа зданиебыр ц1ине хъаъара ад районма ешемишды инсанар умуд ана макъыет диъи гыргара ад гвалахмы. Баласды хизынмыс хынимер хъыдхьын усла хъыгыр ад классма на группама зккед мырад виъи джуьхьды яшайишди. Республикади кьухьдыбише, джуьхьды суруула джат1ур хакьас рухьура гьакь-сана сиене гвалахбыр гьамма гыргара ад, тааки сиене объектбыр гьазыр руъума кьабыл даъас хынимер. Гвалахбыр йыхана еримиш йиъи, луза джыъыр, герексен мида бегедене ма мехьтебырма йыхы1д званукмыд ун йишин бадана быт1рад усул гъад классма на группама.

Б. МЫХАIДЫ