КьыIд аIгаIчуIр, хьад беслемиш йишир а. Гьаса йишийне, эрбыр йикис сагьаIлды бере маба. Куьнед вахтинды гьа байрамас бала убур рыхыIрей, кьыIда инсан и, вихье ад малбыр и азад йишири хьур, шадвалды ваъарай, джубра хъуд сыда ки маIхсил был-булух йиший, зиян-зарарбыр магъуIй хьур Аллагъахьде дилегбыр гьаъарай, ва хаIр хала хьуъ садакьабыр гьаъарай. Гьа байрам кьуле выгыргадид гьадатбыр бала анийиъий, амма гъийгад ихтилат геес йигара эред кьир шууна ваъад виъиди. Гьадид ихтилат ихьды газетес гьыъыри Мафиет ришире:
-Гьакъийкъат гьадат ад йиъий ихьды мыхаIбишихда эрес кьир вухьа ваъад. Гьа куьнед гьадат гьамыъ ки гюзет гьаъара баладбише.
Гьа ямаг гьаъади, сахьусды кывъыр, темиз выъыр, гьазыр выъыр йигара кьир выдж, выше хьидик кивхьир савылтара йокваIйикьама. Гьадыхьван хиесды са чапра хад къаргъадалыед сукбыр ки хьидик кихьир салтара. Джурад гьаIйеге вухьара лубыен, гьис хьурди, лубыенере кIышды ранг сиргад йиъи. Тиниъне ка цIай луькIур ад лахад убруукал лирхьере къуруд якыдид гимадад тикебыр, къуру гьыъыд кваIрчбыр, кьырбымыды цIыс ягълыд вуруъура, гьаса йишийне ягълыд ц1ысы кьир вухьуйне, дад гъами вуруъура. Эрес кьир ваъас йигад хиял ание, гьасад кьырыбыр хъуъ ухуьре. Эрес сиене мадад як лихъирхьере, гьис хьуйне, эрела хъуъ ихъитхьуйне, як бикIере руъура, иштагъ хъуIгъуIрдиш. Як балагема гьухьа гьаъара, кьырыб кьырбыла руъума, хьеликана, суьхьада хьуъ савулдара, аъ цIысык джулды кьырыбыр киджитхьун бадана. Хьеликана, гьазыр гьыъыр ад вы-зы, ари цIысык кыъыр гьухьара, лыIхды истуъутад на са худа хад гьешилды сукбыр ки хиере, дад иштагъды вишин бадана. Кьир вухьамады руъура аады кьул са рыхьыIд сагьаIт, хьели, лахала сехъепIийне кьир, кахъаъара ари гьухьа гьыъыр ад лубыенбыр ки.
Эред йыгъад гьадытдыхьван, яр-дуст, къуну-къумши хала сес ваъара, кьир кывыс хьур, гьа сахьусды шах улесды и эред устIулаа сирхьед. Ва лиджийкьынийис, джиркьынийис ки гьадикла пай сивиргара. Гьадыла кьир гьазамна ка ваъара кьухьды гьаIйега, хала ад хизындис ки, мийманашис ки къуну-къумшиес ки гъивкьасна.

Зарема Исрафилова