Сахьусды октябрь ешлид инсанашды байрамад Йыгъ йиъи. Гьа байрамад Йыгъа артухана агъмишвалдыбыр гьаъара ешлид инсанашис, джуьхьды кьаIсды дидис-нинис, сахьусды кьул, хынимеше, хыдылаше, ярара-дустара ва хуIкиметед идарамыд къуллухчийше. Гьа йыгъад байрам гюзет выъыр, МыхаIд райондид ЦЭВД-хьур Исмаилов Абдул-Маджит Гамзатовичды дур выр ад идарадид къуллухчиер джуьхьды кьухьды Ахмедов Сабир Эфендиевич кьуле гине ва сахьусды МыхаI ад мехьтебед теллебиер дыхьыр ай мийманваIле МыхаI муIкъаI ешемишды еш хъишир ад инсанашихда гьа байрамад йыгъ гьабишис къутли гьаъас хьур.
ЦЭВД-дид кьухьнийды заместителе Кузиева Роза Абдуллаевнара гьади йидкьыр ад хынимешде гьухьури: «Йе-ваIше хаIммише йикIыы хадкьыр йигара ихьды кьаIсды дид-нин. Са гьеми йыгъа диш гьабыр агъмыш дыъыр йигад, гьабишды мысга хатир-хуIрмет увуIхуIр йигад йиъи, гьабишис куьмегбыр гьыъыр йигара, джан-гьазизехьван далгыр йигара ва гьабише гьаъад угутад ихтилат убра лешур йигара».
ЦЭВД-дид магьаIлимеше ки хынимер кьуле эдири, шыв нетидже ана гьеми байрам гивхьир ад виъиди, ва кьаIсды-кьухьнийс хуIрмет выъын шудаъды сываб виъиди.
Гьа йыга гьабыр дыхьыр ай мийманваIле Салахова Гугарчи Таировнахда ва Ильясова Периджан Абдулселимовнахда. ДжваIр агъмиш дыъыныы эккене рази дишири Гугарчи-нин не Периджан-нин, гьабише йидкьыд мийманашис гьыъыри йыхды алхышбыр ва сагъул-варулбыр, ларса гьыъыр чей-чийданбыр гихьири мийманашис.
Гьаса йишийне, йе-ваI сиенебише йикIыы хакьыр йигара — кьаIсдыбишис хуIрмет выъын сиенебишды бырдж йиъид ва гьа лап кьухьды сываб виъид.

Зарема Исрафилова