Нинды чlилды йыгъ агъмиш гьаъара хаlр сыда 21-хьусды февралес. Гьа йыгъ гихьид йиъи ЮНЕСКО-дире 1999-хьусды сыда, убур вын бадана хаlр са халкьдид гьадатмыс ва чlилис.
Нинды чlилды йыгъ — джурад байрам виъи. Гьа байрам агъмиш выъыр ай Мыхаlд сахьусды И. Гусейновад дур гъад мехьтебе ки. Гьади «Мыхаlбишды цlинды хабарбыр» газетед редакциедире не мехьтебере сыт1а выгыр ай круглый стол. Гьа маджлис ачых выъыр мехьтебед директора Ямудин Тамбова. Гьание джыкаlне таныш дыъыр ягъмишдишибыр гьа сиене дуьнйады гъад халкьмыд нинды чlилды Йыгъад таарихехьван. Хьеликана ихтилат гьыъыр, шууна ва мыс ихьды мыхаlд чlилыхда йиширди кихьин-кагъун, шууна увухуlр йыгарди нинды чlел кlаъды халкьмыра. Хьели Ямудин юлдашере чleл выр, мехьтебед магьаlлимеше (Рагимова М.С., Магомедова Л. К., Айвазова З. Г. ва Османова М. К.) гьыъыр докладбыр нинды чlиликлады.
Уфтанды, лазимды ва лейихды, бала деринды ихтилатбыр гьыьыр гьалгыри районди ва республикади дур-ун ад шаир Шафи Амсари. Гьухьури, кьуляа шууна джетин ийди кихьис шиъирбыр мыхаlд чlилыхда алфавит, кихьин-кагъун адишды гедене. Шудаъ ширинды кар виъиди хаlр инсындис джуды ватан, нинды чlел гьацlара руъура гъаъ суруу йишийне бала гемаа. Гьадид сураа кихьир ад шиъирбыр ихьды чlилды устад Шифи-шура йес-ваlc йыхана гьацlара.
Круглый столад иштракчийшихьван онлайн связя йыркьыр ай мыхаlбишды дур-ун ад профессор, ва ихьды чlилды словарь игъийид йигит гьа1лим Алисултан Алисултанов ки. Къутли выъыдыла хъуъ нинды чlилды байрам ягъмишдишибишис, хайиш гьыъыр мыхаlбишда, сувга мываъ хьур мысна нинды чlел, хала хынимешихьван мысга далгыр йыгара хьур ихьды чlилыла, сахьусды кьул шерма ешемишды хизанма.
Йыхды ихтилатбыр гьыъыри баш редактор Тимур Махмудова ки, гьухьур, гъийгъа кьalба гъаъ агъаlчlуд хынхыда ки телефон ха, гьадыла кlаълахъуъ гьанийис баласды ун руъуд урус чlилды йиъи. Тахсир, гьаса йишийне, дидды ва нинды ки йиъи. Тимур Керимовиче сагъулбыр гьыъыр магьаlлимешис ва хынимешис мехьтебед, директорас йыхды подписка а хьур хаlр сыда, дирзир телебиер йыхана кьыле гьаъара хьур шиъирбыр ихьды мыхаlд чlилыла. Шиъирбыр Джамесебды, Нураlмаlдды, Шафид, Бийзат-ришид ва мадды райондид шаирешды, гьыъын ки йыхана кьыле гьыъыр телебийше.
Редакциедид къуллухчи Насир Ибрагимова мехьтебед директорада хайиш гьыъыри нинды ч1илды дарсбыр вылц1ад ва ми маджлис уфтанна хынимешихьван рыкъа1 ивид магьа1лим Милана Османовас вияъ премияне не грамота хьур.
Гьадыла хъуъ, маджлистед ахир бегеде виъиди, ч1ел выри мыха1бишды шаиреде Саид Сулеймановда. Гьание ки маддыбише ка къутли выъыр ягъмишдишибишис гьа йыгъад байрам, ва кьыле гьыъыр джуды ц1инды мыха1д ч1илыла кихьир ад шиъир Сулейман Стальскиед дуруу, гьанийды 155 сен йишинис гюре. Гьа шиъир не ва гьание гьади гьухьуд ихтилатбыр йе саъна лийир а.
Круглый стола гьыъыд ихтилатбыр бегьер руъуда, Мехьтебед директора генеки йик1иы лихъийири, шыв джетинвалдыбыр ади мыхад ч1илды кихьин-кагъун лаъ-хьуъ йишин бадана (ц1ам йиъи китабыр, адиш мыха1бишды ч1илды отделениебыр ч1илды факультетма, агъахара адиш мыха1д ч1илыла хынимешды журнал ва маддыбыр). Генеки сагъул-варулбыр гьыъыр Ямудин Таибова сиенебишис, йыдкьыр иштрак гьыъыд гьа маджлисе.
Б. МыхаIды
