10-хьусды ноябрес мысга агъмиш гьаъад йиъи полициядид Йыгъ — МВД-дид къуллухчийшды гвалахад байрам. Гьадис гюре йес ихтилат гьаъас йыгара кьылевыъынмыд заведениедикла, гьазыр даъад юриспруденциядид, логистикадид, экономикадид ва управлениедид къуллухчиер «Правоохранительная деятельность»-хьур специальность ад. Гьа хусуси профессиональный кьылевыъынмыд учреждение виъи «Юридический колледж»-хьур дур гъад, Дербентди ачых выъыр ад 2014-хьусды сыдыла хъуъ. Гьадыла саваенди, колледж кивир а правоохранительный органмыд къуллухчийшды ва Российский Федерациедид спецслужбамыд Ассоциациеди.
Сахьусды маIгьаIлимер ва къуллухчиер гьадид диъий внутренний службадид подполковник Максим Агамирзоев, РД-над муниципальный гвалахад заслуженный къуллухчи Замир Нагиев, педагогический наукамыд кандидатар Теймур Гюльмагомедов, Роберт Магомедов, высший категориядид маIгьаIлим, РД-над заслуженный маIгьаIлим Фереджулах Мухтаров, юридический наукамыд кандидат Муслим Османов, Марта Мурсалова, Князь Эскеров, сахьусды директор — экономический наукамыд кандидат, РД-над заслуженный экономист Магомед Бабаханов.2022-хьусды сыдыла хъуъ учредитель М. С. Бабахановад кьарарахьан директор ришир ай Тамела Имамединовна Абдурахманова.
Ихьды справка:
гьа рухуд йиъи 28-хьусды ноябрес 1988-хьусды сыда Кумух муIкъаI Курахский района. Дербентди мехьтеб лабтIудыла хъуъ 2006-хьусды сыда каIрчIур ай Москвади Россиядид хуIкиметед социальный университете «Социальная работа»-хьур факультете ва лабтIа выъыр гьа хьуддымысна 2011-хьусды сыда.
2007-хьусды сыда каIрчIур НОУ ВПО «Открытый социальный университет им. С. Стальского» («Русский язык и литература» факультете). 2009-хьусды сыда каIрчIур маIгьаIлимвалды ваъара Дербентди Социально-педагогический института, 2016-хьусды сыда гьнийкла ришишир аIлим кандидат филологических наук Дагъыстанад маIгьаIлимешды университете ва гьа сыда гьанийкла рыъыр кьылебырмыд гвалахад проректор.
Мисте колледжед 10 сен йиъи. ЦIинды виъинехъунки, амма сахьусды юбилей виъи. Тамелара ихтилат гьыъыри колледжед гвалахмыкла гьа вахтиндид.
— КаIчIуд йиъи цIинене хьурахъуъ гвалахмык эгъетIир цIамды инсанаше ари хана кьарар ачых ваъас, хьур, учреждение са знаниебыр высды ваъ, хаIр студентекла гьекъийкъатды инсан гьаъас, хьур. Отзывбыр хьура хъуъ бала ий — лаазимды ер гьувгунид не ва кьылебырмыд программамыд. МаIгьаIлимешды гьашкьдыхьан на джамаIхтид куьмгихьван йе йыхды бин гихьир. ГьаатхыIд сыдырма колледж балана дегиш вишир а. Йе йыдкьыр сихьири цIинды технологиябыр, цIине гьыъыр кьылебырмыд планбыр гъийгъад йыгъа ягъаIдкал ва каIчIур сытIа гвалах ваъара идарамыхьван практика на стажировка гыргасды. Эккед гьунар йиъи цIинды кампус на цIинды лабораториябыр ачых гьыъын. Йыхана иштрак гьаъара наукамыд исследованиема на конкурсма, куьмег вылцIад студентешис лаъ дикис. ГьаатхыIд 10 сыда балад специалистер гьазыр дыъыныла саваенди, йе йыхана иштрак гьаъара шегьердид социальный проектма на культурадид мероприятиема. Шад диъи колледже студентешда руъура, хьур, лаъ гьаъас джуьхьды талант, хыдиймар гьадгус ва гьазыр дикис йыхды карьера ваъас, — гьухьур директора.
— Гъийгъа гвалахад базара ахтармиш даъара йыхды специалистер хаIр областед, ва ихьды колледж лабтIубишда йикиси йыггадиъне гвалах ваъас, — гене рухьура ай Тамела Имамудиновнара. — Йе бытIраана макъыет диъи, гьили выш ягъаIрди, ва кьылевыъынмыд программабыр гьа кар гюзет гьыъыр дегиш гьаъара. Ихьды теллебийшис хаIр гьаъара сиене гьакьасабыр, гъийгъад йыгъара ягъаIд. Йыхды, лазимды практика ва стажировкабыр гыргара. Гьадыла саваенди гьаъара меслягьаIт идарамыхьан кьабыл даъас дыгад йыхды специалистер гвалаха.
Са чIилихьан, колледжед кьухьдыбыр макъыет диъи, шууна виширди специалистешды гьуIмир колледж лабтIудыла хъуъ.
— Яхда анивиъи «Выпускник года»- хьур программа, ягъмиш гьаъад хабарбыр, шууна виширди ихьды выпускникешды гвалах, — беслемиш хъыъыр джуду ихтилат директора. — Мысга хуткунбыр гьаъара, гьацIара гьаъара, гьили гвалах ваъарди, шыв лазим йиъиди.
Ихьды везифе — са хаIр дыъын диш, гьадыла саваенди чалыш диъи куьмег выс хаIр выпускникес йыхды гвалаха аIчIус. Йе шад диъи, баладбыр гьабишикла мааки лаъ диъи, хьур, кьухьвалдыбыр гьаъара а, ачых гьаъара а, хьур, хусуси предприятиебыр. Колледже ари профориентациедид ва гвалаха дуруъус куьмег гьаъад Центр а.
Суал: шыв хайир а гьадикла?
— Центракла балад куьмег руъура гъазыр даъас студентер гвалахас, — рухьура Тамела Абдурахмановара. — Гьадикла хайир ад гьагва гьаъара балад показательмыра. Сахьусды, сытIа меслягьаIтбыр гьаъара гвалах высдибишихьан юристешды сферади, гьадис гюре йичIере гьувгус ихьды выпускникешис лазимды гвалах, гыргас стажировка. 70% студентеше гыргара практика дур-ун ад юридический фирмама ва хуIкиметед идарама.
КьваIдхьусды, йе гыргара балад семинарбыр ва мастер-классбыр иштрак гьаъад йыхды юристеше, гьабише вылцIара йыхды советбыр, гыргара консультациебыр хаIрнийхьван резюме гьаъас. 85% выпускникеше, хуткунбыр гьыъыйне, гьухьури, Центрара эккед куьмег вылцIара гвалаха аIчIус, гьувгас гвалах.
— Саки хухъуткас, шууна гьувгара директорас мидыла хъуъды джуды гвалах?
— Гюзет гьаъара, йе чалыш диъидид себебыр лаъ- хьуъ дикис ва гвалах базара ва кьылебырмыд стандартмыра ягъаlд кал чалыш дуруъура, умуд ваъара гене, сиене гьакьаcабыр, гвалахбыр йыха хъикис, хьур, — гьухьур гьание. — Плана а экке гьаъас кьылебырмыд программабыр, кийир гьамык цIинды направлениебыр на специализациебыр, лаазимды гъийгъа юристешды гвалахмы. Гьадире мааки лаъ гьаъас студентешды знаниебыр ва гвалах вацIынвалды джваIр дагъаIд джигима. Чалыш дикис мааки йыха гьаъас арабыр юристешды фирмамыхьан, хуIкиметед идарамыхьан, лаъ гьаъас цифровой технелогиябыр, студентер хаIр даъасды. Бала гьаъас наукамыд исследованиебыр ва публикациебыр, колледжед дур лаъ йишин бадана академический сообществади. Умуд ки, гьадис ихьды колледж мааки бегемиш викис, хьур, студентешис не гвалахбыр вылцIабишис, ва ихьды выпускникешеки кьуле гыргас, хьур, йыгадкал джуьхьды ниятбыр.
Б. МЫХАIДЫ
