Гъаъ йибкьыр а кьы1дид сахьусды ваз. Мыкьбыр къалин йишир а. Гьемисед мыкьды вахтинды инсанашис йигара руъура бик1ерды ягълыд улесдыбыр, ва бик1ерды рагъасдыбыр. Быт1рад, дад кид улесдыбыр мыха1бишихда баладбыр а. Амма гъийгъад ихтилат гейес йигара ха1некла. Ми мыкьды вахтинды джалахьуъды гьадат йиъи мыха1бишды ха1р хала иштагъана бик1ерды ха1н рагъад, гьадире гьилды джандик рывыр киере, гьилды джандис ма1фагьа1т вылц1ара, гьис хьурди гьад гьаъад йиъи темизды кьирид сукакла.
Ха1н гьыъын ц1амды замха1т диш, рухьура ха1н гьаъасдыкал гьац1ад ришиймаше.
Шууна дуьзене гьыъыр йигад йиъиди ха1н, мыха1бишды газетес ашкара гьыъыри Мыха1ды Рагимова Фируза Меджидовнара:
«Ха1н шууна гьаъарди зас гьагва гьыъыд ихьды Камилет-нин риъи, гьа риъи изды дидды нин. Гьание ха1ммише рухьуд йиъий «…шывга пеше ха1р выъыйне, йыха йиъи», гьадыла гьамыъ аала лаъ диъид джигьилеше ки суга гьыъыр йигардиш ихьды эвела хьуъ ад гьадат-нубатбыр.
Ха1н гьыъын бадана, сахьусды гьазыр ваъара ха1несды ху1р. Ху1р гьазамна ка выъыр йигара, гьисхьуйне, ха1н кьы1д гьа1тхыр хизындире рагъара, гъараа кийрхьуд мийманас гирхьере, гьилды къуну-къумшиес ва яки бейдедбишис гьухьур гьазырды ха1некла пай сивиргара, халды-хизындид кьулуула садакьа йиший хьур. Аады кьул са чивала ад кьир ишлемиш ваъара. Ху1р выъын бадана, ери чивал кыывъыр темиз выъыр ад кьирид хьидик сувч1е ваъара, са йыгъа хьидик кивилтере, хьа1ли хьидикла гъаъ кихъвилъэре, хьед кахъа1ч1усна сюхьади ывъара, са1хле саптыр, тиниъне гьазыр гьыъыр ад са кьухьды таяна ыхъывъара. Ма1хьа1не мабана, лам кимадана кьир сиг1ыд джигыди гивырк1а ваъара, уу вызыки сийир, савылтара са хьибды йыгъа. Гьа бериды кьир угъвулгъара. Угъувгъуд кьир гъаъ гывъыр са сухьруды быт1рана къуру хъаваъара.
Мадад ери кьирид чивалакла ваъара мыгал.
Хьа1ли кьва1бси кьир са сындихьван кипха выъыр, дыхьыр руха1хъанашде руха1аа сивигас вылц1ара. Гьадыхьван сыт1ана ха1нед ху1р гьазыр виъи.
Ху1р гьазыр виъине йишийне, вада йигад вахтинды ха1н агъус руъура. Ха1н агъун бадана, ларсыд хьидик кывъара ху1р, лызыдкал кыйхы1р, нин кивхьир, выше гирк1а гьыъыр салтара йоква1йикьама. Агъуд ха1н хьа1ликана серинди джигыди уху1ре, гьис хьурди сиг1ыд джигыди ч1ырч1ыма бала йикиси.
Ха1н гьухьа гьаъади, хьиб пай хьидид кывъыр йигара, са пай агъуд ха1нед. Гьухьара уу лаха гъад гедене, гьа кид-кине кыйха1 гьыъыр йигара, аала кьан джутхьун бадана. Гьа1ег лаха вухьара ливхьир йигара аады кьул кьвунды сагьа1та. Гьухьадире хьед ц1ам хъишир укъа руъура. Укъа йишийне, гьа рухьуд ч1ел виъи — ха1н гьухьур ани йиъи хьур.
Ха1н рагъад гедене, сывыд ху1р кывха1 выъыр, гьаъара гьадихьван улесды сывыд кьут1быр. Сывыд кьут1 на ха1н бала йыхана гъеблере са сындихьван. Ха1н иде руъура рагъади качылма на дык1ыйма.
Зарема Исрафилова
