7 мартас Мыха1д Культурадид Управлениедид зала агъмиш выъыр ай хьылешды байрам – 8 Мартад Йыгъ. Гьадис гюре гьади ягъмиш дишир ай райондид идарама къуллуха гъад ва Мыха1 ари ешемишды хьыле, рышба1, мехьтебырма ад хынимер.
Мыха1д районди ад хьылешис къутливалдыбыр гьаъас йыдкьыр ай районди ад идарамыд кьухьдыбыр. Гьа йыгъа ад ухшер гьа1къийкъат байрамад виъий.
Мыха1д райондид кьухьды Сулейманов Давуд Амаевиче администрациедид сураа ва  джуду сураа ягъмиш дишир ад хьылешис хьадид быт1рад байрам  къутли выъыри. Гьание генеки йик1ыы лихъийир ягъмишдишибишис 8 Мартад тарих, гьухьур, гъийгъа ихьды ху1кимете хьылеше выг1лешихьван сыт1а иштрак гьаъара а сиене гвалахма — яхда анидиъи дур-ун ад хьыле: ма1гьа1лимер, духтурар, гьа1лимер, экономистер ва маддыбыр. Хьыдылды – халды йик1 йиъи, усул, берекет, хынимешды нин риъи, гьанийыла асыллы йиъи выг1лешды гьунарвалды, шадвалды, шад-гуямишвалды.
– Генеки, ху1рметли ихьды хъыдгад хьыле, ва1с гьеми байрам нубарак виший, сагъ – шад диший, мысга ва1 шад – гуямишне диший.
Ху1рметли ихьды нинабар, ришиймар ва рышба1! Ва1с сиъинбишис 8 Мартад Йыгъ къутли йиший, ва1 шад дыъый выхьды выг1леше, хынимеше, хыдылаше – гьухьури райондид кьухьние.
Гьадыла хъуъ Давуд Амаевиче выри наградабыр йыхана гвалах ваъара ад ма1га1лимешис, духтурашис, маданиетед къуллухчийшис. кьухьды хизан гивхьир ад райондады хьылешис.
Хьели ква1ч1ури райондид Культурадид управлениедире гьазыр гьыъыр ад уфтанды концерт. Мирзабек Азизханова быт1рана кьуле выгыи концертед программа.
Хьылешды хатирес уфтанды  на1гьнибыр гьыъыри — Вели Шахбанова, Ильгар Османова, Шахри Азизхановара ва мадыбише.
Йыхды  программадыхьван гьади выступать дишир ай Мыха1д музыкальный мехьтеб не Хлютский школа искусствади кьылебыр гьаъара ад телебиер.

Зарема Исрафилова