Дагъыстандид таарих хьуъ гетIесды йишихьвна, йес гьада гьагуси бала агъырвалдыбыр ва джетинвалдыбыр йишид вахтбыр ихьды Дагъыстанас.
Мидыла 25 сен улихьде, август вазыра, Дагъыстана дагьвиед агьвалат вишир ай: 7-хьусды августас 1999 сыда Басаева на Хаттаба гъилы лийир ад бандформированиебыр Чечнидид суруулады саргъаIтала игъитхьур йидкьыр Дагъастан джухьды хылихьде ваъас хьур ниятбыр йикIиы гъана. Амма дагъыстанабыр са тIекьийкьеды ки ялгъылмиш дишир диш ва, хыл-хыле выр, гъуIн-гъуIнес йыхыIр, люздири душманашис мидиъ дыкьасды раIхъ йибтIир. Хьибды йыгъа, тааки хуькийметед къушумбыр еринды лийкьама, хыле ярах хадишды Ботлихед, Цумададид ва Хасаюртдид джамахаIт са вишир, правоохранителешихьван ари хана, гъигъене лувзур ай гьабыр Дагъыстанди аъ сиджидгыр. Ватан гудже ыIвхыIр адикла хабар ившийне, сиене Дагъыстанди ад миллитмыкла хаIр районди, хаIр шегьерди ягъмиш йишир добровольческий отрядбыр. Добровольцыйшды отряд МыхаIд районди ки гьазыр йишир ани йиъий. Гьа отрядак кваIчIур ай 30-ла артухды инсан. Амма, федеральный войскамыд кюмег йишийне, мидады гадиер хуьдуьргъе дыъыри. Ополчениедид отрядак кидбише гьа вахтинды, йыгъ-выш джухьур, саргъаIтмы макъыетвалды ваъара ай, гьис хьурди МыхаIд райондид не мадды хуIкийметмыд саргъаIт са йиъи.
МыхаIды джамаIхтид ополчениедид отрядак гьа гедене кинийиъий ихьды йигит, бисягьаIтди ки Ватан увуIхуIре ад СВО-ди Султанаев Идрис Султанаевич.
Мисте, 7 августас, 25 сен тамам йишир а гьа гьакьасабырмыла хъуъ. Гьа гедене сиене дуьнйадис гьацIара йишири, кIаъды Дагъыстандады миллитдид джанде кьухьды, гиджичIед йикI ад йиъид, ва яхда ярах хана йыркьыд душман ихьды дагъыстанад ярахада йикьисды. Дагъыстан гьадыла хьурагине ки са гъараады душманас муьтIуIгъ вишид диш ва яя мысна викис ки диш.

Зарема Исрафилова