Саласадид йыгъа, 7 ноябрес 2023 сыда, Махачкалди Р. Гамзатовад дур гъад Национальный библиотекади йыгыр ай Мыха1д шаиред Рамазанова Бийзат-ришид «Ха1р быч1ихда джуды дур а» хьур китабад презентация. Ми гьанийды кьва1дхьусды китаб йиъи шиъирмыд – сахьусды китабад дур йиъий «Банымыд хан Нигебан».
Презентациеди ягъмиш дишир ай балад инсанар: ихьды мыха1бишды ва мадды дагъыстанабишды гьаа1лимер, Махачкалди республикадид кьухьды гвалахмы гъад мыха1быр, магъа1лимер, шаирер, шаиред яр-дуст, бегедебыр, гьанийды шиъирмыхьван танышды инсанар, Бийзат-ришихьван саджигиди мехьтебе кьылевыд юлдашер, телевидение, журналистер ва балад мадды-маддыбыр.
Презентациедид президиума усул выгыр хьуланды ихьды республикади дур-ун ад юлдашеше: Ибрагимов Ибрагим Ибетуллаевич – Дагъыстанад Кьухьнийды аксакалашды Советед Седри, Мамутаева Интизар Асадуллаевна – республикадид хьылешды Советед Седри, Казибеков Вагаб Гаджиевич – Дагъыстанад халкьдид Советед представитель, Алисултанов Алисултан Султанмурадович – доктор филологических наук, ДГПУ-тед профессор, Ибрагимова Мариза Оглановна — доктор филологических наук, ИЯЛИ ДФИЦ РАН-дид сахьусды научный сотрудник ва ридж, ихьды шаирешды ц1инды ливир ад ха1дий Бийзат-риши.
Иштрак гьаъад мийманашис ч1ел высма презентацие гыргад ихьды Алисултан Султанмурадович юлдашере, сиенебишис хваш-беш выъыдыла хъуъ, ихтилат гьыъыр ц1инды китабакла ва таныш дыъыр генеки сиъинбыр ц1инды шаирехьван ва гьанийды китабак кид шиъирмыхьван. Ихьды гьаа1лиме мисе гьухьур, Бийзат–ришид сахьусды шиъирбыр, «Мыха1бишды ц1инды хабарбыр» хьур республикадид газета лийид, бала бегемиш йишир ай кьыле гьыъыбишис…
2016-хьусды сыда игъитхьур ай гьанийды шиъирмыд сахьусды сборник «Банымыд хан Нигебан» хьур. Ва гьамыъ, рыхьы1д сен гьатхы1да хъуъ, йе таныш дуруъура а сиъинбишис рац1ыр ад Бийзат шаиред шиъирмыд ц1инды кьва1дхьусды сборникехьван «Ха1р быч1ихда джуды дур а» хьур. Ц1инды китабак китхьур а бала деринды ва уфтанды мыха1д ч1илыла кихьир ад шиъирбыр: «Эскерешис», «Дагъыстан», «Мыха1 ай выг1ле», «Россия зурбад виъи», «Дидды хал», «Хылид халыче», «Къархыбыр», «Духтурашис» ва мадды-маддыбыр. Шиъирбыр Бийзат шаире кихьир а бала деринды, джалахьуъды ихьды атабабыйшды ч1елмыхьван, гьадыла гьа шиъирбыр джураана гинийиъи мыха1бишды шиъирмыд арыди. Хъуъдире-хъуъ, гьамыъди вахтинды, инсанар юкьсура далхвада, алалаъды джигьилешис, баласды гъаъ суруу гъад, йик1иыла увулхара а кюйнед мыха1д ч1ел. Гьадыла, эккед гьунарна халкьара за Бийзат-ришид чалышвалдыбыр ишлемиш хъаъас ихьды далгад арыди эвелды мыха1д ч1елбыр. Са сураа гьанийды шиъирбыр бала дериндыбыр йиъи, са сураа, гьание джуду фикирбыр ругъа гьыъыр а сиенебыр гедкьасды ч1илы, ишлемиш гьаъара ихьды нинабар, дидабар далгад, джалахьуъ угут, тербие вылц1ад ч1елбыр, хизындид арыди джуьхды гьа1р са йыгъад йешайишва1ли ишлемиш гьаъад ч1елбыр…
Джураана эккед кьимет выс йыгара Бийзатды шиъирмыс, кихьир ад дидикла, ниникла, шуькла, рышед не ришид гьабыр хъыдгынвалды уфтанна увга выъынис гюре. Бийзат шаиред шиъирмыра ес гьаргва раъара бала йыхды рыш, риши, велед хъывгад нин, гъеблид ришбишды хыди, хуькиметед инсан ва гьакьаллы мусульманка-хьыдылды. Гьанийды шиъирмыра еде балад гвалахмы ц1инене ачых гьаъас вылц1ара улабыр.
Гьадыла, гюткес джишир, гюзет гьаъара йе гьанийды ц1инды китабыр, гьухьур ихьды дур ад республикади гьаа1лиме Алисултан юлдашере.
Хьеликана Алисултан-магьа1лимере Фазил Дашлайды къутливалдымыд ихтилат гьыъыри, Бийзат ришис телифуна сигыр ад, джуда хъикьас джишир. Джац1абишис – Фазил Дашлай йиъи член Союза писателей России, уфтанды переводчик йиъи мыха1бишды шиъирмыд, гьанийды переводбыр ки кини йиъи ц1инды китабак Бийзатды. Гьание ки эккед кьимет выр а Бийзат шаирес.
Хьеликана гьание ч1ел выр далгыри гьади хьуланды юлдашер: Ибрагимов Ибрагим Ибетуллаевич, Мамутаева Интизар Асадуллаевна, мыха1бишды маэстро, шаир ва композитор Шафи Меджидович Ибрагимов, Казибеков Вагаб Гаджиевич, Мамедов Мамед Шахбанович, Ибрагимова Мариза Оглановна, Ибрагимова Эминет Ибрагимовна, Абдулжелилов Гасангусейн Бабаевич, Мыха1д райондид имамашды советед седри Кадимов Гьазрат Джабарович, Магомедов Байрамбек Бейдуллаевич, Сулейманов Саид Гаджиевич ва маддыбыр.
Гьабише ки эккед кьимет выри Бийзат-ришид шиъирмыс, гьанийды кьвундысинды китабырмыс, къутливалдыбыр гьыъыри йишир ад презентациедис гюре, сагъул-варулбыр гьыъыри эккед, къисмат гьыъыри сагъды джан, шадды йик1, мааки балад кьувебыр, мидыла хъуъ ки чалыш рикисды ц1инды шиъирбыр кихьис, гьадыхьван сыт1а, ц1инды китабыр игъийис.
Гъеблид ва уфтанды рецензия (кьимет) выр а Бийзатды ц1инды китабас Мариза Оглановнара ки. Гьа риъи китабад редактор. Эгер йыхана гедкьыр йыганахъун Бийзат-ришид шиъирмыхьде, йидиклады йиъиди ц1инды китаб, кьыле ваъ Мариза гьаа1лимед рецензия китабад сахьусды джара гъад, выхьди хыле йишийне китаб «Ха1р быч1ихда джуды дур а».
Гьа йыгъа Бийзат-ришид гюгьуьл лешур ай выр гьанийис эккед быт1рад быч1имыд т1ычбыр, подарокбыр ва наградабыр.
Джуду суруула Бийзата эккед сагъул-варулбыр гьыъыри йыдкьыдыхъундыбишис презентациеди, джус китаб игъиес кюмег выбишис, джуды спонсорашис – Давудай Абдулсемедович Девришбековас, Неби Мустафаевич Муфараджевас, хыл-худ йывхы1духъундыбишис китаб хьура-хьалайыкама гьазыр гьаъади игъиес.
З. МАГАМЕДОВА
