Ураза-байрам МыхаIд районди ки сиене Дагъыстанди ка агъмиш выъыр ай 31-хьусды мартас. Байрамад йыгъад йаькваIс МыхаIд Галды мездик куб-дин гьаъад инсанаше увцIур ай. ГьаIр йыркьыние выри хизындила садакьа. Сасыние сынийис къутливалдыбыр гьаъара Ураза-байрамас гюре, шадана, раазине гьазыр дуруъура ай куб ваъас имамахьван. Куб кувчIусма Абдуселим имама сиъинбишис, сив хакьыдыхъундибишис, къутли выъыр Ураза-байрам: Аллагьара кьабыл гьыъый, хьури, гьыъыдыхъунды ниятбыр, хиялбыр, гьадагъуй, хьури, йыкьасдад байрама, хайишбыр гъыъыри Элигъанийда мусурманашис, гъийгъа джетинваIли ад, эккед кьуве, иман ва рахаIтвалдыбыр вий, хьур.
Кубала хъуъ имама сиъин байрамад иштракчийшда мисед хайиш гьыъыри: «Ихьды мыхаIшурара, меценат йиъид, джуды дур ашкара гьаъас джыгыд, ният гъыъыр, сигыр а джуду суруула садакьа — хаIр инсындис, сив хакьыр миди мездике йыркьынийис. Мида гъаъ хъит1иди леш гьа садакьа гьанийды шурад инсанара пай гьаъади, рыIхъбыр джыъыр, амани ихьды ки, ихьды Меценатад ки хайиш йиъи ваIдяа — леш гьа манутмык йыхды идды улесдыбыр, хайира ругъа гьаъ, лемебуш гьамык бапIрыс, рагъад гьарамсызды карбыр». ХаIр мездикяа гъаъ хъиркъынийды хыле йигит Меценатад шурад инсанара выри гьагъзыр манут. Эккене рази дишир ай инсанар, рухьура ихьды Меценатахда: «Джуды Аллагьара кьабыл гьыъый», хьур.
Гьасад йыхды гвалахахьван бегьем вишир Галды МыхаIд мездике агъмиш выъыд Ураза-байрам.

Б. МЫХАIДЫ