10-хьусды июлес Дагъыстанди йыгыр ай балад магьракатбыр Россиядид Йигит Магомед Нурбагандов йигитне дуьнйадыла гьархы1д 10 сен литхьудис гуьре. 10 сен улихьде джигьил офицере кьул саъ выъыр диш душманашды улихьде ва гьабише гъагъус чалыш дишид гвалах ваъас йич1ир диш. Гьанийды джываб йиъий:- «Гвалах ваъ, шубе!» («Работайте братья»!).
Магомед Нурбагандовды араады хизан, джуды яр-дуст, ху1кийметед гвалахмы гъад къуллухчиер ва шегьерди ешемишды инсанар ягъмыш дишир ай Йигитес лихьир ад сириладид улихьде. Гьание гьа гедене гьухьуд «Работайте, братья!» ч1илмыд гъавыр виъи :- «Ватан уву1х, гьидыхдана гаджатхъы1р»!  Россияд кьухьние  Владимир Владимирович Путине  Магомед Нурбагандовды йигитва1лид гьунырдид шумаиди таариф гьыъыри. «Гьакъикъат джанде йик1 ад, йигит дух йиъи, джуды ч1илыла а1гъджа1ч1уд ва ватан масак джывыд, мыхра нафас адийкьама, ватан увуху1д», - гьухьури Президенте Магомедыхда.
 «Ес, дагъыстанабишис, Магомед са  Россиядид  Йигиткал диш гьац1ад, гьа йиъий гьакъикъатды дагъыстана-шура, джула кьухьнийды ху1рмет хывкьас гьац1ад, выдж гьухуд ербыр йик1идана хъыгад ва дуьзды дидды-нинды тербие луьвшур ад», - гьухьури Фёдор Щукине.
Дагъыстандид кьухьние Федор Щукине Йигитед дидде Нурбаганд Нурбагандовда гьемисед ч1елбыр гьухьури: «Выды дух Дагъыстандид ки ва сиене ихьды ху1кийметед ки дамах виъи. Гьанийды дур ху1кийметед таарихек кихьир ад йиъи. Выхьды хизындире духарыс лаазим йиъид кал, дуьзды  тербие выр, гьакъикъатды йигит кьухьва гьыъыри. Эккед сагъул виъи ва1с гьасад Йигит духарыхъаъ!».
 Иджласад ахирес Фёдор Щукине не Нурбаганд Нурбагандова быч1быр сихьири Россиядид Йигитед памятникеде  Махачкалди ад.
Гьа церемонияди иштрак гьыъыр ай общественный деятелеше, политикеше, депутаташе ва  правоохранительный органмыд къуллухчийше ки.

Зарема Исрафилова