23-хьусды июлес МыхаIд райондид администрациеди йиркьыр ай Мирзеханов Селимхан Салманханович. Гьа йиъи директор Дагъыстандид региональный социальный фондад «Все вместе» хьур. Райондид кьухьды Сулейманов Давуд Амаевич кIыбла хъуъ дерде ани йиъий Селимхан Салманханович МыхаI йиркьын бадана, гьис хьурди гьанийхьван гьаъасды меслагьаIтбыр ва кьуле гыргасды суалбыр бала ани йиъий.
Амма ДРСФ-дад директор миди йиркьыйне, Давуд Амаевичда джуда иштрак гьаъас йишир диш администрациеди выгыд иджласа.
Гьадыла иджласад гвалах кьуле выгыри райондид кьухьнийды общественный безопасностед сураа заместителе Насир Меджидович Раджабова.
Ва гьа иджласа иштрак гьыъыри райондид УСЗН-дид директора Магомедрагимов Амур Магомедовиче, КЦСОН-дид директора Османов Амрах Ниязовиче, Рутульский райондид Общественный палатадид председатель Акимов Надир Курбановиче, мыхаIбишды газетед главный редактор Махмудов Тимур Керимовиче ва администрациед къуллухчийше.
Гьа иджласа иштрак гьаъас йидкьыр ай ихьды райондады Специальный военный операцияди дыркьыд гадийшды дидабар ва нинабар.
Сахьусды кьуле гид иджласад суал йиъий: шыв кюмегбыр выр йигад йиъиди дыркьыд эскерешды хизынмыс тангымыд сураа, ва шууна гьабишды мадды дердибыр ки сыла гьаъасди.
ХьаIли кьваIдхьусды суал йиъий: шыв льготабыр сипхьурди СВО-дид иштракчийшис.
Гьа суалмыд сураа ки ва мадды иджласа хьуъ гетIид суалмыс Мирзеханов Селимхан Салманхановиче выри бала ачыхды джывабыр.
Селимхан Салманхановичда хуткунбыр гьыъыри иджласа иштрак гьаъара ад СВО-ди дыркьыд эскерешды дидабаше, нинабаше ва гьанийис ихтилат гьыъыри джухьды къавгъу-дердимыд. ХаIр суалад бадана гьание гьабыр кьуле эдири.
Мирзеханов Селимхана, администрациедид къуллухчийше ва МыхаIд райондид социальный гвалах кьуле выгыргара ад структурамыра гьабишис чIел выри сиене суалмыд дерде дикиси хьур.
Иджласад ахирес Селимхан Салманхановиче пай гьыъыри СВО-ди дыркьыд ихьды дагъыстандады йигитешекла кихьир цIинене игъийир ад китабыр.
Гьадыла хъуъ Селимхан Салманханович гьархыIри Хъылда муIкъаI, гьади ешемишды СВО-ди дыркьыд эскерешды хизынмыы салам сувгъус хьур.
Зарема Исрафилова
