Дагъыстандид вергибыр кьабыл гьаъад идарадид къуллухчийше СВО-дид иштракчийшды хыле высды пахъпахъыйбыр лешур а.
Гьадис гюре, Дагъыстанди Федеральный вергимыд гвалах кьуле выгыргад Управленидид къуллухчийше агъмиш гьыъыр ай хьуланды акция — гьабише ягъмиш гьыъыр ай тангабыр специальный военный операциеди иштрак гьаъара ад эскерешис джва1ршида руъуд кюмег выс, хьур. Гьа акция йыгыр ай кьуле гине вергибыр кьабыл гьаъад ведомствадид регъбер Айдар Байрамов.
«Гьеми ц1инене сахьусды хыл диш хьуланды акция е гыргара ад ва мидыла хъуъ ки е ха1ммише гьазыр диъи ихьды Ватан уву1ху1ре ад йигитешис еда вуруъуд хыл-худ йывхы1с, гьа ихьды сиенебишды бырдж йиъи», — гьухьури Айдар Байрамова.
Ягъмыш йишид тангымык масак лешур ай хьиб пахъпахъый, джетинды джигымаа хьуъ йигас йикисды.
Гьа пахъпахъыйбыр мида бейдене лийкьа гьаъасды йиъи передовая.
Мидыла улихьде сигыд питбайкбыр ерынды лийкьыр анийиъи.
К1ыбдикал генеки вергибыр кьабыл гьаъад ведомствадире хьуъ эскерешис сигыр ай юкьуб квадроцикл, машинбыр, дава-дарманбыр, радиоэлектронный да1гьви выгыргасды комплексбыр ва мадды улесды-лаъасдыбыр.

Зарема Исрафилова