Дагъыстанад Правительствадид Седрие Абдулмуслим Абдулмуслимова 23 райондид не 5 шегьердид кьылевыъынмыд идарамыс выри 50 ц1инды машинбыр.
Гьабыр лешун бадана кагъур ани йиъи 160,9 млн манут, регионад Правительствадид пресс-службадид хабардихьван.
Абдулмуслим Абдулмуслимовды ч1илмыхьван, ха1р сыда ц1инды автобусбыр выйне, мехьтебырмыд автопарк йисе йикисдиш.
Фуланды, ц1инды услахьван беземиш гьыъыр ад автобусма эдирхьаIре 12 — 24 инсан.
«Ху1кийметед сахьусды бырдж йиъи, сийне хынымешис сакалды кьылеваъасды условиебыр гьыъын, шегьерди ешемишдыбишиски ва хырыда ад к1аъды муIкъма адбишиски.
Ха1р са хыных сагъ-саламатана мехьтебе лийкьа гьыъыр йигара, герексен гьабишды дидды на нинды йик1 архыйн йиший, джуьхьды хынымешик рыкъа1-кьуле зиян-зарар кийкьасдиш, хьур.
Гьадыла, гьемисе кид-кине автопаркас ц1инды автотранспорт выйне, эккед раха1твалды викиси сиене кьылевыъыныд системадис, ва лаъ викиси гьадид доступность. Дагъыстандид Правительствадире гьеми сахусды хыл диш иштрак гьаъара ад Федеральный программади автотранспорт ц1ине гьаъад телебиер мехьтебырма ледкьа даъасды. Мистед сыда генеки иштрак хъаъасды йиъи гьа программади. Гьалаки е гуямиш диъи, выр ад ц1инды микроавтобусмы», — гьухьури Дагъыстанад премьер-министре, джу джуды хылаа хьуъ, йидкьыр ад представителешде ц1инды машинбыр вылц1ад гедене.
Гьемисагьа1тди сиене кине мьехьтебырмыда йиргара хани йиъи 740 машин. Гьадис гюре, гьа машинмыра дыгыргас мистед сыда мехьтебе 26 гьагъзыр хыных.
2025 сыда генеки хъывыс хьур а 20 автобус.

Зарема Исрафилова