Махачкалди поездмыд вокзала йыдкьыр ай 10 хыных нинабар хъуна Донецкий Народный Республикада. Гьабишды рыкъаI йыбкьыр ай дагъыстанабишды делегация республикадид гвалахад министред заместителехьван Абдулкерим Абдуллаевыхьван.
Едед хынимешды, 4-дыла 14 сен йишир ад, кьвунды хаIфтидид арыди джанбыр джанды хъыгасды йиъи республикадид гвалахад Министерствадид ребилитациемыд центрма.
«Они НАШИ»-хьур благотворительный фондад кьарарахьван йиъи гьа гвалах кьуле выгыргара ад, гьадид кьухьды йиъи Анатолий Черников.
«Нетийдже ихьды фондад — кюмег вын хынимешис ОВЗ ад. 2024 сыдыд хьадахъуъ е кьуле гыргара ад йиъи проект «Они наши дети»-хьур. Гъийгъа е йидкьыр сытIа 10-ды хынхыхьван на ва гьабишды нинабашихьван мийман йыгад Дагъыстанди. Регионад реабилитационный центрма гьабыр сагъ-шад хъыдыъыныла саваенди, республикади гьабыр дыгыргаси экскурсиема, гьаъас гьабишис ва гьабишды нинабашис мастер-классбыр», – гьухьур Анатолий Черникова.
Махачкалди йидкьыбыр кьвундиъне пай дыъыр а: сабыр дикиси Республикадид реабилитационный центра «Надежда», сабыр – хизындис ва хынимешис кюмег вылцIад Реабилитационный центра.
«Хьибыд сен йиъи е кьабыл даъара ад хынимер гьа регионма. 200 инсанаc кюмег выри ихьды центра. Баласды нинабар кьуIнехьусды хыл йиъи мидиъ дуруъура ад бегемиш йишир…», — гьухьур «Надежда»-хьур реабилитационный центрад кьухьние Диана Хайдаковара.
Джуьхьды суруула нинабаше сагъул-варулбыр гьыъыр ай республикадид ва реабилитационный центрмыд кьухьдыбишис.
«Сахьусды хыл диш е ми центра дуруъура ад. Гьегъийгъат гьа йыхды виъи ва эккед кюмег руъура ихьды хынимешис.», – гьухьур гьабише.

Б. МЫХАIДЫ