375-ды джигьил хизынмыс сиене республикади ад выр ай ц1инды халмыд ачарбыр. Гьа багьад подарок сасад хизынмыс выр ай Дагъыстанад Кьухьние Сергей Меликова. Гьабыр йиъи хизанбыр, мидыла хьуъ гюзет гьаъара ад джуьхьды квартирабыр 10-15 сыда. Гьа вахтинди баласды хизанбыр кьухьва хъишир ай, хынимер хъидшир, амма инсанашды дердибыр кьуле гыргара адиший.
«Республикадид кьухьды йишид сахьусды йыгъала хъуъ гьа агьвалата нерази йиъий, гьадыла 2022 сыда, гаджадкьы1р сиене джетинвалдымыхда, ц1ине хъывыъыр программа гъилы лихъивир. Йыхы1р артухды тангабыр, гьадгур махкамды подрядчикер, бегьем гьыъыр сиене объектбыр кьуляа джыбра. Ва гъийгъа хизанмыра, умуд мабдишды агас, хьур, джва1ршис халбыр, ц1инды халма йыдкьыр байрам ваъара а», – гьухьур Меликова.
Гъийгъа эккене шад диъине ц1инды халмыд ачарбыр выр ай 4-ды шегьерди: Махачкалди, Каспийскади, Хасавюртди ва Кизилюртди.
Махачкалди ц1инды квартирабыр выр ай «Вузовское озеро»-хьур микрорайонди ад яшайишед комплекса, Каспийскади – микрорайона №7, Хасавюртди – Восточный микрорайона, Кизилюртди ц1инды хал луза гьыъыр а микрорайона №3.

Б. МЫХАIДЫ