Дагъыстанди знаниемыд Йыгъа, 1 сентябрес, 16 ц1инды гьамыъды кьылевыъынмыд учреждениемыра ачых гьаъаси джуьхьды ракбыр. Гьа хабар выъыр Республикадид Кьухьние Сергей Меликова джуды Telegram-канала, гьадыхьван сыт1а гене гьагва гьыъыр шууна йыхана лаъ-хьуъ виъиди йыхды яшайишед инфраструктура региона.
Ц1инды кьылевыъынид сыда гвалах ваъара ка1ч1ус луза гьыъыр бегьемды 14-ды мехьтебере ва 2-ды хынимешды садикере. Сиене объектбыр, луза гьыъыр ад республикадид программадихьван, йыхана дарсбыр выс йикисды ва лаазим йиъидкал хынимер ха1р даъасды оборудованиебыр сихир гьазыр йиъи.
«Дагъыстан баласды регионмыла хьура гинивиъи мехьтебыр ва садикбыр луза гьыъынид сураа ва йисдыбыр ц1ине хъыъынис. Гье хьурахъуъ ка1ч1уд ка диъине а ва джубра хъидхьуд арабыр ки дюзгин хъаъара а, гьаъас мадад гвалахбыр ки гьала бала йиъинекун ки», – гьухьур Сергей Меликова.
Регионад кьухьнийды ч1елмыхьван, гьаатхы1д джубраады сыдырма республикади кьуле йыгыр а лап балад гвалахбыр: луза гьыъыр а 110-ды хъаъ балад мехьтебыр, 41 гьагъзыр телебийшды ербыр ад, гьадыла саваенди 94 хынимешды садикбыр ки. Гьадыла саваенди, капитальный ремонт гьыъыр а 374 кьылевыъынмыд объектма, гьадис гюре йыха гьыъыр вылц1ад дарсбыр на ва тербиебыр.
Сергей Меликова джураана маа гьухьур, XXI веке вишир йыгардиш агьвалат, хынимеше кьыле ваъасды лубкура ад ва йисды мехьтебырма.
Республикадид кьухьдыбише джат1ур выгыргара а гвалах гьадид сураа, гьазыр гьыъыр бегьем йиъи проектбыр луза гьаъасды ва ц1ине хъаъасды йисды объектбыр йыкьасды хьура хъуъ сыдырма, гьувга ваъара гьадыхьван сыт1а чалышвалды сиене дагъыстанабишды хынимешда йикисне саккална кьыле ваъас.

Б. МЫХАIДЫ