Гьадхы1д хамисды йыгъа, 27 ноябрес, Республика Дагъыстанад Кьухьные Сергей Меликова хъывылцIара ай джывабыр джамаIхтире выр ад суалмыс. Гьеми хылис выгыр ад Прямая линия Дагъыстанад кьухьнийды Сергей Меликовды виъи хьубхьусды. Дагъыстанад Минцифрадид статистикадыхьан, прямой линияди йидкьыр а сиене сытIана 650 духъунды суал. Прямой эфире Дагъстанад къухьные джываб хъывыр ай 40-ды суалас хьибды са1гьатала балад вахтинди. Баласды суалбыр инсанаше выр ай: Махачкалда, Гьахтид районда, Каспийскада, Дербент шегьерда ва Цунтинский районда.
Дагъыстанад джамаIхтире сигыр ад баласды суалбыр йиъи дюз-дюзгин гьыъын джваIр ешемиш диъид муIкъбыр на шегьербыр, гъебле хъыъын раIхъ-кьулбыр, накьумыд суалбыр, газад, тукад ва здравоохранениедид суалбыр.
ГьаIр инсанада хъывыс йикисий джуду суал ва гьаъас ийкисий ихтилат джуду четинваIликла гьеми телефонад номера 8 (8722) 98-90-81. Гьадыла савайине выс йикисий суалбыл сайта voprosglaverd.ru. ва социальный сетьма Сергей Меликовды «ВКонтакте». Мистед прямой линиеди суалбыр выс йишир ай Максад чат-бота «VoprosGlaveRD_bot» (max.ru/voprosglav…)
ВаIс йикIыы лихъиес йыгара, хуIрметли ихьды газет кьыле гьаъад юлдашер, шесды сыда ки гьеми 29 ноябрес вишид виъий Дагъыстанад Кьухьныйхьан прямая линия.
Гьади Сергей Меликова дагъыстанабишды суалмыс джывабыр хъывыр ай 3 сагьаIта. Выр ай джываб 35–ды суалас, баласды суалбыр йиъий инсанашды ешайиш лаъ гьыъынид, тукмыд, хьедмыд, транспортмыд ва Украинади гыргара ад специальный военный операциедикла. ДжамаIхтид суалмбыр бадана Сергей Алимовиче дыъыр ай тапширмиш районмыд, шегьермыд ва министерствамыд кьухьдыбыр. Мадды суалбыр прямой линияди джываб джывыд джуды контроле лешур ай.

Насир ИБРАГИМОВ