Ми йыгъырма ихьды къумшиди мийманваIле йиркьыр анириъи авар-миллитдиклады Каспийск шегьерди ешемишды джигьил-хьыдылды. Гьа ихьды мида-мидиъды МыхаIд муIкъуIд дамад-дарад шилвалы на чIирид-чIыкыд бытIраваIли, мирима ад хьидид ва гьавыдид серинваIли бала гуямиш ришир анириъий. Са гьаIфтидид арыди гьабыр хьиба-юкьа хылис дыхьыр ай аъ Лалаъан дериде, ва сецIедылады, балад хырыдад мамзила джытхьыйне ки. Гьадаа гьабише ягъмиш гьыъыр ай цIамды хаIр джура чиек кахад укьбыр ва тебиргIанбыр.
ТебиргIан худлас дарман виъидиклаа мийман рышес хабар виъий, амма гьадиклаа мыхаIбише тебиргIанад гьахьун гьаъад гьанийис гьацIара адиший. Гьадылаа гьанийис гьа шууна гьаъасди гаркъас бала гьавас ани виъий. Мийманахьван сытIана за ки тамаше гьыъыри, шууна гьаъарди тебиргIанад чIиргъин.
Сахьусды къизкъинды цIай йишир йигара лахахьде, гьайвыр гьаIегаа ларсын йидкьын бадана. Гьадыла меслагьаIт йишири, гъаъна быстана бахыере цIай гихьир, ливхьис хьур гьаIег. Хьидыы ларсын литхьудкал, уу кыъыри сидгъыр, темиз гьыъыр гьазыр гьыъыр ад тебиргIанад тилибыр. СаIхле гьухьара сатыри, джубурбыр гъыдиле руъумады, хьеликана са дуршлагахьван кехъет1ири кьухьды легне ари. Сиене тIилибыр гъаъ кехъетIийне, мыкьды хьидыхьван сихъидгъыри. Хьеликана бытIрана чIыдгъаI хъыъыр руугъуд кьутбыр гьыъыр сихьири са суруу кал.
Кюйнед вахтинды, тукбыр ва як сиргад машинбыр адишды гедене, чIиргъинед кьутбыр етед ий духла, амма гьамыъ раIхаIтвалдыбыр ана йыха йиъи, гьайвыр як сиргад машин кывхыIр сакьада гагъури йишир ад кIутбыр.
Са кьадарды кьел ки кивир, темизды дзырад банкама аIшур, уула къалпахбыр гъигъе гьыъыр, серинди хала сихъихьири ихьды къумшиере банкIабыр, улесды чIиргъинед кьадар кепIир.
Масты наIкьыдихьван ари кыйхе гьыъыр, хьури сухьруды сихьири чIиргъин, тезед хьывахьван иштагъна луьъури халды иессиед хал-хизындихьван кине сиенебише гьазырды гъафун. Ва тисене луьвкIа выъыр самывар, гьазыр гьыъыр ай туьнтды чей.
Мийман рышес ки бала бегемиш йишири мыхаIбишды тебиргIанад чIиргъин, ва иштагъ йишир ай кекутбыр кийир ад лывырсара ад самыварады бикIерды чей.
Халды иесcийшис экrед сагъул-варулбыр гьыъыри гьание джус йыхды хурметбыр гьыъыри хьур.
Зарема Исрафилова
