ДАIГЬВИЕД СЕС

1. Да1гьвие духре гьатхы1р ад нинабар,
Шуба1шикла хабар выгад ришиймар,
Дид хъикьаси хьур, хынимер адарцыр,
Ригихда гуьт1ур гимадад къариймар.

2. Шаклы мадуьгъ, душман выхьды джыбра а,
Эджел хал залым ха1ле гьугъара а,
Ахьтиет диш ва1 Аллагьа аманат,
Нинис вы некьа1 мыкьлана гьагур а.

3. Шууна гьухьуси нине — дух мардиш захда,
Гъил ц1ыя йыкьыр, гьурхьуд ялмишехда,
Вы валана Ватан бадана гьархьы1д,
Йик1 ад, ламыс кид, рухьура за вахда.

4. Ва1калды духре бала а да1гьвиди,
Яраллыед заримыд ун а гьади,
Хъуъ агъа1ч1ур, гедгыдбыр сыт1а хъидшир,
Гъийгьа ва1 гихъийдхьуны у шад диъи.

5. Мадишдыбыр йик1иы удхас дич1ес диш,
Мададбыр еде хадгъус йич1ес диш,
Ара хана шуба1 кал къуше, къуше,
Ха1юхь, валхуд къафла ягъмиш хъивч1ес диш.

6. Гьу1мирдид мамзил йыкьа1 кьат1 йишири,
Выхьды дуру ял кывхьыр хук вишири
Кедгыр мерд дурешик гюллидид лышан,
Йигитва1лид дур дуьнйадис ишири.

7. Гъалибне азад дишид юлдашешис,
Душманар икрам гьаъас меджбур дикис,
Тарихе адгаси выхьды гьунарбыр,
Ва1 ес гьатхыд банахьван сакал дикис.

Хыныхвалды

1. Нинды хыле за накь гьаъасий,
Хъывга1дий зас хыныхвалды.
Диде джан-гьа1зиз ваъасий,
Хъывга1дий зас хыныхвалды.

2. Бахтид рак ачых йишийне,
Ришис дерди ваъас вишийне,
Гьу1мирды пашмал джишийне,
Хъывга1дий зас хыныхвалды.

3. Викисмады нафс, писвалды,
Хизындид вишид сагъвалды,
Адиш ма гьасад шадвалды,
Хъывга1дий зас хыныхвалды.

4. Хаджалат, хифат адишды,
Джанде кьуве а хардж дишды,
Хурмет абгыд юлдашешды,
Хъывга1дий зас хыныхвалды.

5. Гьа вахтбыр ес ахъджигыр а,
Джигьилвалды кьыб либхьур а,
Кьа1свалды пехил хъившир а,
Хъывга1дий зас хыныхвалды.

6. Аллагьехьде виьи са дилег,
Убра ун йиший лай-лаед,
Гъигъе джишир йик1ид гюлег,
Хъывга1дий зас хыныхвалды.

с.Рутул, 2023 год