Дагъыстандид Правительствадид Седри Абдулмуслим Абдулмуслимов йыхьыр ай Беларусь Республикади ад кьухьды легкий промышленностед «Полесье» дур гъад предприятиеди. Гьа виъи парчебыр на ухурбыр агъахад кьухьды завод.
Предприятиедид директор Виктор Войтовиче гьухьури, заводахда ани виъи гьасад кьуве — 20 джура ухур игъиесды.
Сиене кине заводаа гъани йиъи 7 гьагъзыр кв.м. ва 1500 инсанара гьади гвалах ваъара а. Миди агъахара парчебыр хырхасды ухурбыр ки ва рихьир гьазырды карбыр ки: валыгмар и, месимы сахабыр и, ва мадды гьасад лазимды-герекды вы-зыбыр, дыныд, ба1мба1ка1д ва трикотажед ухурмыкла гьыъыр ад.
Фуланды заводара агъахара эскерешды валыгмар ки. Гьа валыгмар игъийинис гюре заводара масак лепшура ООО «СПОК Маяк М-1»-хьур Дагъыстандид предприятиедида сидгъа гьыъыр ад темизды дынбыр.
Дагъыстандид Премьер-министрес Абдулмуслим Абдулмуслимовыс гьагва гьыъыри эскерешис агъахара ад валыгмар, гьа валгыд парче 70 % гьыъыр ад йиъи дыныкла.
СПОК «Маяк М-1» идарадид кьухьды Ахмед Курбанова гьади хьуъ гетIир ай суал Дагъыстандире не Беларусере шууна ари хана дыныкла хайир лешусды.
Хасавюртовский районди ад ООО «СПОК Маяк М-1» сахьусды хьури гид предприятие виъи дынымыд эйлюг гьыъынид сураа.
«За фикир ваъара, Дагъыстанабишда йыхды хайир лешус йикиси дыныкла, гьис хьурди Дагъыстандады дын герек йиъи Беларусьди, гьадыла пыч джыъыр еда йикиси ари хана дыныкла хайир кетIес. Гьадыла саваенди Дагъыстанди ачых йикиси гвалах ваъасды джигаабыр», — гьухьури Курбанова.
Дагъыстандихда на Беларусехда фикир-ниятбыр ани йиъи сытIахана худа ивес гьа гвалах ва игъиера ад маIхкамды продукциед объембыр мааки артух гьаъас.
Виктор Войтовиче гьухьури, Дагъыстанда лепшуд дын йыхды йиъи, хьур, ва выдж эккене рази йиъи, хьур, Дагъыстандихьван сытIана гвалах ваъас.
Абдулмуслим Абдулмуслимов ки Дагъыстандид кьухьды Сергей Меликовды кюмгихьван гьазыр йиъи гьа лазимды гвалах джуды хываI луьвшур кьуле выгыргас.
«Сахьусды кьул, ес рихьис йигара мехьтебе ад телебийше лаъасды са усул ад валыгмар, Совет хуькиймет ад вахтиндыы лаъад калды ва эскерше лаъад валыг», — гьухьури Абдулмуслимова.
Гьа гвалах йыхана кьуле выгыргасды кьуве анивиъи «Полесье» заводахда. Гьади руфатбыр гьаджабгуд валыг ки кине гьаъас йичIере.
«МисагьаIтди гьалаки далгыр разиваIли йидкьыр а Дагъыстандады дын сигас хьур гьадиъ завода, ухурбыр гьыъын бадана. ХьаIликана гьа ухуракла гьыъыр ад парчидикла валыгмар рихьис йикиси ари Дагъыстандики, ва «Полесье» завода ари ки»,- гьухьури Абдулмуслим Абдулмуслимова.
Зарема Исрафилова
