Дагъыстанад Премьер-министр Абдулмуслим Абдулмуслимов ха1сил йишир «Время героев»-хьур программадид иштракчийшихьван: дагъыстанабишихьван Энвер Набиевыхьван ва Магомед Валиховыхьван, генеки Мордовиядады эскерехьван Алексей Жбановыхьван, йыркьыр ад Дагъыстанди мийманва1ли.
Регионад кабминед пресс-службадире выъыд хабардихьван, ху1кийметед гвалахмыхьван ха1р даъад Энвер Набиевад на ва Магомед Валиховад наставник йиъи Дагъыстанад Кьухьды Сергей Меликов, Алексей Жбановад наставник – Мордовиядид Кьухьды Артем Здунов.
Биссагьа1тди Энвер Набиева на Магомед Валихова стажировка гыргара а Дагъыстанад Кьухьнийды ва Правительствадид Администрациеди, тааныш дуруъура а подразделениемыд гвалахахьван, гьади гьазыр гьаъад документмыхьван, иштрак гьаъара а гьади гыргад мадды мероприятияма.
Абдулмуслим Абдулмуслимова Алексей Жбановас хачкурдибыр гьыъыри дагъыстанабишды накьуды, гьухьур, мийман хъыгад республика шад виъи мисед йыхды мийманашы. Гьание гьыъыр ихтилатбыр Дагъыстанакла ва сахьусды лазимды проектмыкла, кьуле гыргара ад экономика лаъ-хьуъ выгын бадана, ва мысга гьазыр йиъи, хьур, куьмег выс, хыл-худ йывхы1с йыггад джетинды суалбыр хьуъ гийтхьуйне.
Специальный военный операциедид иштракчийшихьван суьбетбыр гьаъади Абдулмуслим Абдулмуслимова ихтилат гьыъыри джуды хьурагинды правоохранительный органма выъыд гвалахакла ва джуды гьа вахтиндид яшайишекла, кьуле эдир, шууна ха1р выъыр йыгарди ху1кийметед гвалах.
РД-над Правительствадид Седриере эккене куьмегбыр гьаъас, хьур, Энвер Набиевас на Магомед Валиховас кьылебыр гьаъади ки ва стажировка руъудики.
«Е 24/7 ва1хьван мысга связа гъана, ва1дяа йикиси йыггад суалад бадана хайиш гьаъас, кине ехьван ваъас гвалах. Балад гвалахбыр а ва1с бегемиш йикисды. Йыхды, кьыле выъыд кьухьдыбыр, ва сахьусды кьул – дирибашды ва эдемивалдыбыр ад инсанар мысга лазимдыбыр диъи. Ва1 — ихьды халкьдид гьунар йиъи. Ва1 — ихьды мыхьыл, куьмег йиъи, ва1 и ми республика мидыла хъуъ ки лаъ-хьуъ выгыргасды. Ва е ки мысга бегеде дикиси», – гьухьур гьание.
Йик1ыы лахъахара, «Время героев»-хьур федеральный программадид мырад виъи гьазыр дыъын йыхды кьухьдыбыр СВО-дид иштракчийшикла, хьели ху1кийметед гвалахбыр гьаъас йикисне укьсура. Программадире гьамыъды гвалахмыхьван ха1р даъара кьухьвалдыбыр гьаъас гъийгъад вахтинды ва инсан йидж ки лаъ-хьуъ гыргара.
Б. МЫХАIДЫ
