27-хьусды июлас Дагъыстандид Правительствадид Седри Абдулмуслим Абдулмуслимова ачых гьыъыр ай Даъыстанабишды выг1лешды на хьылешды арыда гыргара ад шахматмыд чемпионат. Гьа чемпионат гыргара ад йиъи Дагъыстандид сахьусды Президентвалды выъыд Муху Алиевды 85-сенйишинис гюре.
Чемпионат йыгынид гъилы-кьулу гъани виъий Дагъыстандид физический культурадид не спортад Министерство ва РД-над шахматмыд Федерация.
Махачкалди ад Исторический парк «Россия-моя история»-ди ягъмиш дишир ай дур-ун ад Дагъыстандады шахматистер. Гьабишыла савае турнире иштрак гьаъара а Россиядид мадды регионмады шахматистеше ки — Чечнидады, Ингушетиядады, Екатеринбургдады, Новороссийскадады, Кабардино-Балкариядады ва мадды шегьермады. Дагъыстандид сура 72 титулованный спортсменеше, спортад мастереше ва мадды чемпионатмыд призераше иштрак гьаъара а беслемиш вишир ад турнире.
Абдулмуслим Абдулмуслимова джуды сура ва Дагъыстандид кьухьды Сергей Меликовды сура салам сувгъури сиене мероприятиеди йидкьыр ад мийманашы. Правительствадид Седриере эккед сагъул-варулбыр гьыъыри республикадид сахьусды йишид Президент Муху Алиевыс Дагъыстан бадана эккед джафа сихьир, хьур, ва гьание кьыле гьыъыри шудаъды гвалахбыр кьуле йыгырди Муху Гимбатовиче Дагъыстандид яшайишбыр йыха йишин бадана.
-Ха1р са гвалах кьул-кьулук кине, лазим виъид кал хьуъ выгыри Муху Алиева. Гьанийды гьунурдире Дагъыстандид социально-экономический развитие ки хьуъ йидкьыри, республикади ешемишды халкьмыд арыда ки ху1рмет къалин вишири ва ха1ммише, сиенедид сура эдемивалды гуьзет выъыри гьание.
«Зы гуямиш йиъи зас гъийгъа гьеми маджлиса иштрак гьаъас къисмат гьыъыр а, хьур, ва гьемисед таарих ад ихьды Дагъыстанашурад бегеде лузас къисмат гьыъыр а, хьур. Муху Гимбатовичды мысга йик1ыы гъад ният-дуьзвалды, джама1хтис йыхвалды выъын йиъий. Гьельбетдики дуьзды ра1хъ кеп1ир, ва гьа рыкъа1 ана, арыда-саныда выгыри гьание джуды к1аъды ватан, выдж кьухьды йиъид вахтинды», — гьухьури Абдулмуслимова.
Абдулмуслим Абдулмуслимова генеки ихтилатбыр гьыъыри Муху Алиевыкла ва гьание гьыъыд йыхды гвалахмыкла.
Ихтилатад ахирески гьание Муху Алиевыс джандид сагъвалды на йик1ис ра1хатвалды арзуламиш гьыъыри.
Турнир лап1т1уда хъуъ, выг1лешды джурана, хьылешды джурана Дагъыстандид сборный командабыр кет1есды йиъи. Гьа командамыра иштрак гьаъасды йиъи йикьасды сыда СКФО-ди гыргасды шахматмады чемпионата.
Чемпионата гьалиб дишидбишис высды йиъи дипломбыр, медальбыр ва тангабыр. Турнире дуьлхъесды йиъи блиц-игради, гьа рухьуд ч1ел виъи- ха1рнийс са ход гьыъын бадана фикир ваъасды ц1амды вахт выси, хьур. Ха1рне, са партия 10 минута бегьем ваъасна.
Зарема ИСРАФИЛОВА
