Дагъыстанад Правительствадид Седрие Абдулмуслим Абдулмуслимова республикадид Конституциядид байрамад хьурагинди йыгъа, 25 июлас, РД-над Кьухьнийды Сергей Меликовды дуруула выр ай эккед наградабыр дагъыстанабишис, йыхана гвалах выъыд республикадид экономикадид лазимды отраслима.
Махачкалди Дружбадид Хала гьа церемонияди гене иштрак гьыъыр ай РД-над Кьухьнийды ва Правительствадид Администрациедид кьухьние Махач Омарова, РД-над Совет Безопасностед Секретаре Магомед Баачилова, республикадид Правительствадид Седриед заместителе Рамазан Джафарова ва маддыбише.
РД-над Кьухьнийды Сергей Меликовад дуруула Дагъыстанад Правительствадид Седрие Абдулмуслим Абдулмуслимова салам выр церемониядид иштракчийшис ва къутли выъыр виъине ад ху1киметед байрам — Дагъыстанад Конституциядид Йыгъ.
«26 июлас е агъмиш ваъара сахьусды ху1киметед байрам, ихьды таарихди джама1хтид шадды йыгъ кал йыбкьыд, раазивалды выр сиенебише ешемиш дикис са халкь ка сиене джамаха1тмыхьван Россияди ад. Кьабыл выъын ц1инды Конституция йишир лазимды кьарар дагъыстанабишды халкьмыд ху1кимет гъигъе вишин бадана, йыха вишин бадана демократия ва правовой ху1кимет йишин бадана, сиене дагъыстанабишда лаъ-хьуъ дыкьас раха1тене йишин бадана… », – гьухьур премьере.
Дагъыстанад Правительствадире сиене валаетехьван сыт1а кьуле гыргара а лазимды инсанашис Конституциядид положениебыр, савалды вишин бадана сиене дагъыстанабишды арыди. «Лаъвалды асыллы виъи ха1р са инсындыла, ихьды гвалахала Ватан бадана», — гьухьур Абдулмуслимова.
Россиядид ва Дагъыстанад безопасностекла гьалгади, премьер-министре гьухьур, гъийгъа гьеми джетинды вахтинди йигит эскереше иштрак гьаъара а специальный военный операциеди е бадана, ихьды азадва1лид бадана ва Ватан бадана. Дагъыстанабишды йигитва1лис, дирибашва1лис эккед кьимет выр а валаетдид кьухьдыбише.
Мероприятиядид иштракчийше Ватандид защитникер йик1ыы хъыдгыр т1екьикьедид гийтхьинихьван.
«Джыгара и, сиенебишда хъидыкьас йиширдиш сагъна халмы. Е кьул саъ ваъара дыркьыд йигитешды улихьде, джигьил гадийшды, е бадана гьу1мир выд. За йик1яа ч1елбыр гъаъара, ра1хмет ваъара дыркьыд СВО-ди йигитешис, хьур, рухьура дидабашде не нинабашде… Дыкьа са минута гьабыр йик1ыы хъыдгас», – гьухьур ягъмиш дишибишде Абдулмуслимова.
Эккед дур ад ху1киметед наградабыр выри 34 дагъыстанашурас, йыхана замха1т биъид республика бадана.
Наградабыр выбишик – РД-над Кьухьнийды Указахьван гьадгва дыъыр медалехьван «За проявленное мужество» лейтенант Зураб Ахмедов, прапорщик Абдула Ахмедов, доброволец Гусейни Бицирамазанов. Метеостанциедид кьухьнийис Магомед Магомедовас, балад сыдырма мыкьды банымы гвалахбыр гьыъыд Цумадинский района, выри медаль «За доблестный труд». РД-над Кьухьнийды дур гъад сагьа1тбыр выр ай полицияди гвалах ваъад Насир Ахаевас на Руслан Пайзуевас.
Российский Федерациядид Президентед благодарность выр ай РД-над культурадид къуллухчиес, Дагъыстанад заслуженный артисткас Кристина Рамазановас.
«Заслуженный работник культуры Республики Дагестан» выр ай Дагъыстанад ху1киметед кукламыд театрад къуллухчиес. Абдулмуслим Абдулмуслимова сагъулбыр гьыъыр сиене культурадид къуллухчийшис выгыр ад эккед гвалахас гюре.
Пожарад частед кьухьнийис Камил Абубакаровас выр ай звание «Заслуженный работник пожарной охраны РД».
Йик1иыла утха дыъыр адиший духтурар ки.. Диана Акавовад, Руслана Каплановад, Заграт Магомедовад, Анита Халиковад дуруула къутли выъыр байрам сиене республикадид духтурашис премьер-министре.
РД-над профсоюзад къуллухчийшды Республикадид комитетед седриес Марзижат Бутаевас выр ай медаль «За труды во благо Российской семьи».
«Барс-Курск»-хьур формированиедид доброволеце Гусейни Бицирамазанова лешур медаль «За проявленное мужество» Дагъыстанад премьер-министред Абдулмуслим Абдулмуслимовад хыляа. Эскер позывной «Агул»-хьур дур гъад награда лювшус хъиркьыр ай Ватанды Курскада.
Абдулмуслим Абдулмуслимова выри знак почетный званиедид «Народный поэт Республики Дагестан»-хьур дур ад аварашды шаирес, «Соколенок» ва «Литературный Дагестан» журналмыд баш редакторас Тубхат Зургаловас.
Церемония бегьем вуруъуди Абдулмуслим Абдулмуслимова сиене наградабыр лешубишис гьыъыр къутливалдыбыр.
«Гъийгъа баладбишды дурубыр сыхы1ри, джуьхьды йыхды гвалахахьван, эккед замха1тмыхьван кюмег вылц1ад инсанашис, Дагъыстан ва Россия гъуджли ваъадбишды. За йик1яа сагъул ваъара выхьди гвалахас, ваъад республикадид халкь бадана, Дагъыстан бадана. Гене къутли ваъара изды суруула ва сиене правительствадид суруула ва1с байрам. Сахьусды кьул, ми сиене темизды йик1иыладыбыр йиъи ихьды республикадид Кьухьнийды суруулад Сергей Алимович Меликовад. Йыгара сиенебишис къисмат гьаъас азадвалды на секинвалды, шадвалды, йыхды гвалах республика ва сиене Россия бадана! Е мысга са дишир йыгара, яа вышне гъами дикисдиш. Сагъ виший ихьды Дагъыстан!», – къутливалдыбыр гьыъыр Абдулмуслим Абдулмуслимова ягъмишдишид иштракчийшис.
Б. МЫХАIДЫ
