26 июлас Дагъыстанад халкьдире агъмиш гьаъара джуду байрам — Дагъыстан Республикадид Конституциедид Йыгъ. Шегьерма, му1къма гьадис гюре гыргыра эккед мероприятиебыр ва концертбыр.
Республика Дагъыстанад ц1инды Конституцие выъыр йыгад суал кьуля сихьир республикадид Верховный Советед Президиумара 1991 сыдыд ахирес. Хьад руъуди 1992 сыда гьазыр гьыъыр ай юкьуд Конституциедид проектбыр. Гьа проектмыкла республикадид Верховный Советед Конституциедид комиссиедире гьазыр гьыъыр са проект, дестикь гьыъыд Дагъыстанад халкьмыд депутаташды съездере, вишид ноябрес 1992 сыда. Ихьды республикадид ц1инды Констиуциедид проект сиене газетмы лийир ай халкь таныш вишин бадана. Джама1хтире кьыле гьыъыдыла хъуъ ва сасад дегишвалдыбыр ки гьыъыдыла хъуъ, 10 июлас 1992 сыда республикадид Верховный Советед 25-ды сессиядире кьабыл гьыъыр проект ва сигыр РД-над Конституциядид Собраниеди. 26 июлас 1994 сыда кьабыл выъыр ай Дагъыстан Республикадид Конституция.
Гьа Дагъыстанад Конституциядире вагъа1д кал дегиш выъыр ай Республикадид ху1киметед органмыд система. Выъыр ай джама1хтире келъэд Президентед пост — сахьусды Республикадид Кьухьнийды, испольнительный властед кьулугъад.
Ц1инды Республикадид Конституциедик кийир а демократиедид ху1киметед принципбыр, лазимды правовой гьакьасабыр, кюмег высды республикадид кьуве лаъ вишин бадана савдымыд арабыр йишийне.
Гьа политикадид документахда тарихед кьуве а хьур гьухьус йикис, йисхьурди сиене Дагъыстанад халкьмыра, кьабыл выъыр Конституциядид Собраниеди ц1инды Конституцие, гьасаб гьыъыр гьад йыгъ-джама1хтид байрамад Йыгъна.
Сахьусды Дагъыстан Республикадид Конституциедире дестикь гьыъыр лазимды демократиедид принципбыр республикадид конституционный строед, эккед инсанашды ихтиярбыр, ц1инды ху1киметед арабыр.
Лаъвалды Конституциедид гьа виъи ки, гьадире узаконит гьыъыр а Дагъыстан Республикадид правовой статус, дестикь выъыр а ху1киметед суверинитетвалды.
1-ды статьядик киниъи: «Дагъыстан Республика — суверенный, са виъид, демократиедид ху1кимет, Дагъыстанад сиене халькьмыд къавгъу-дердибыр уху1д».
2-ды статьядик киниъи: «Республика выъыр а са дыъыр сиене Дагъыстанад халкьбыр, са выъыр сиене дагъыстанабишис Ватан».
Гьа шувалды ад Дагъыстанад халкьмыд хизындик кине гвалахбыр гьаъара яшайишне гъаъ-аъ диъи ихды райондид инсанар ки.
Насир Ибрагимов
