Да1гьви кувч1уд йыгъа, 22-хьусды июнас, Махачкалди «Россия – моя история»-хьур паркад ма1хлиди выгыр ай ха1р сыда выгыргад сиене халкьмыд «Огненные картины войны»-хьур акция.
Ми хылис акциядид иштракчийше люк1а гьыъыд 25-ды шамакла выъыр ай «Родина-мать зовет»-хьур скульптурадид шикил, саки лийчир ад дурнуймашды Дагъыстанад шаир Расул Гамзатовды бютиндуьнйады дур ад шиъирек кид.
Шамбыр гьа йыгъа люк1а гьыъыр: республикадид вице-премьере Муслим Телякавова, РД-над джигьилешды гвалахмыд министре Камил Саидова, РД-над гвалахад ва социальный развитиедид министре Магомедзагид Кихасурова, Махачкалдид врио мэре Джамбулат Салавова, халкьдид активистеше, молодогвардейцыйше ва маддыбише.
Джамбулат Салавова журналистешихьван гьалгади гьухьур, гьазыр гьаъас ми акция е сес выъыр ай иштрак гьаъас джигьилешды организациемыхда сиене региона.
«Мисед гвалахбыр е гыргара ад йиъи Великий Отечественный да1гьвидид 80-сен йишинис Гъаалибва1лид Йыгад. Сахьусды кьул гьабыр гьыъынид нетийдже виъи джигьилешис ватан хъывгынид сураа тербиебыр вын. Гьадыла йиъи гъийгъа миди сес выъыр иштрак гьаъара ад сиене джигьилешды организациемыра. Гене сагъул ваъас йыгара сиене мисед гвалахмык иштрак гьаъабишис, мисед быт1рад карбыр гьыъыр йыгара мысга.», — гьухьур гьание.
Йик1ыы лихъийис, сен хьурагине, Ленинед дур гъад площади иштракчийше люк1а гьыъыд шаммыкла выъыр ай Рейхстагды сывхы1д Гьаалибва1лид Пайдахад шикил Россиядид Йигит Абдулхаким Исмаиловад дурухда.
Акция, беслемиш йишид 2020-хьусды сыда, «Единая Россия» партиедид «Историческая память»-хьур проектехь кид йиъи. Гьадид нетийдже виъи Ватан хъывга выъын джигьилешис, ва йик1иыла утха джыъын ихьды таарих. Мибыр кьуле гыргара абыр диъи республикадид джигьилешды гвалахмыд Министерство на Махачкалдид администрация.
22-хьусды июнас республикади йыгыр ай балад мероприятиебыр Великий Отечественный да1гьвидид 80-сен йишинис Гъаалибва1лид Йыгад.

Б. МЫХАIДЫ