Мисте 8-хьусды мартас цIыса сен йиъи Крым Россиядик кихъивир ад.
Крымдид полуостров ва гьади ад къала-шегьер Севастополь таарихди кIыблаа хъуъ Россиядид чIир-чIикбырна йиъидбыр йиъине ес-ваIс гьацIара.
Таарихды гьамыы ул баладбишды гъай — англичанашды, французашды, туркешды, чалышды шуунага джуьхьды хылихьде гьаъас хьур.
Гьа ербыр кIыблаа хъуъ сиенибишис йыгара адбыр йиъий, йисхьурди гьади Черный ва Средиземный дерйагьмыд хьидыы гыйгъаIд карбыр контролировать гьаъас руъура гьади ад эскерешда. Гъийгъа гьади ад эскерешды связед локатармыра са еридухъунды дуьнйадид джыгаабыр контроля хабкьыра а.
Мадды хуIкийметмыс гьасад гьакьасаб бегемишдиш, сахьусды кьул Западад хуIкийметмыс, гьадыла Россиядихьван Украина, Турция ва мадды гьади бейде хад хуIкийметбыр ара лийис чалыш диъи.
2014-ды сыда Украинадид националистешды хылабахьван НАТО-дис Крым джуды хыле лювшус йыгара ай, джуды эскерешды база гьади сивхьис хьур. Россиядире гьа гвалахбыр на ниятбыр кьабыл гьыъырдиш, гьис хьурди ихьды гьуIкийметед агьтиетдис эккед четинвалдыбыр гьаса йишийне йикисий.
Гьади, Крымский полуострова, Симферопольди, сыдырмыхьван ешемиш диъий балад хизанбыр урусашды ва мадды халкьмыд, эскерер диъид. Националистешис лап балад фашистешды зулум ваъас йыгара ай миди, даIгьви ивир гьади ад халкьмыд арыма.
Гьадыла РФ-дид кьухьдыбише, Президентед Владимир Владимирович Путинед ихтиярахьван, Крымдид джамаIхтид референдум гыргас кюмег гьыъыри. Гьади баласды инсанаше гьухьури — джваIршис йыгара Россиядихьван сытIа дикис.
Гьадис гюре, РФ-дид Президентере эгъепIири кьарар — халкьдид ният Россиядид Федеральный Собраниедире кьуле гыргаъ, хьур, Россиядид депутаташе ки, сиенебыр сытIа дишир, РФ-дид Президентед Кьарарас тааликьды «Ий» гьухьури!
18 мартас 2014 сыда Крым ва Севастополь кьабыл хъыъыри, эвельды таарихды йиъидкал, РФ-дид арыди цIинды кьваIд субъект кал гьаIсаба гьыъыри гьабыр.
Баласды Западад хуIкийметмыс гьа гвалах кьабыл вишир диш, санкциебыр ва правокациебыр гьаъара, Луганскади ва Донецкади даIгьви ивир.
Аммани ихьды хуIкийметере гъийгъа шывга ки гьаъара а ихьды халкьмыд, ихьды сиенебишды аIгьтиетвалды генеки гуджли ваъара, гьис хьурди е быш дишийне, гьади генеки гьабыр дикиси чалыш мааки ес гудж ваъас.
Гуджлид Россия секкинийис некьихьде ки гьувгур выгад диш, ихьды эскерешды гудж, ихьды халкьмыд савалды, Крым ва Севастополь ки кине, виъи ихьды аIгьтиетвалды ва ихьды сагъвалды.
Гьадыла е-ваI генеки гьухьур йыгара «Сагъул» е удухуIд эскерешис ва ихьды валает Россиядид кьухьдыбишис. Яхда ад таарихди гьа са раIхъ виъи – гьа раIхъ ки, хывкьыр, увухуIре а!
Б. МЫХАIДЫ
