Мисте 8-хьусды мартас ц1ыса сен йиъи Крым Россиядик кихъивир ад.
Крымдид полуостров ва гьади ад къала-шегьер Севастополь таарихди к1ыблаа хъуъ Россиядид ч1ир-ч1икбырна йиъидбыр йиъине ес-ва1с гьац1ара.
Таарихды гьамыы ул баладбишды гъай — англичанашды, французашды, туркешды, чалышды шуунага джуьхьды хылихьде гьаъас хьур.
Гьа ербыр к1ыблаа хъуъ сиенибишис йыгара адбыр йиъий, йисхьурди гьади Черный ва Средиземный дерйагьмыд хьидыы гыйгъа1д карбыр контролировать гьаъас руъура гьади ад эскерешда. Гъийгъа гьади ад эскерешды связед локатармыра са еридухъунды дуьнйадид джыгаабыр контроля хабкьыра а.
Мадды гьу1киметмыс гьасад гьакьасаб бегемишдиш, сахьусды кьул Западад ху1киметмыс, гьадыла Россиядихьван Украина, Турция ва мадды гьади бейде хад гьу1киметбыр ара лийис чалыш диъи.
2014-ды сыда Украинадид националистешды хылабахьван НАТО-дис Крым джуды хыле лювшус йыгара ай, джуды эскерешды база гьади сивхьис хьур. Россиядире гьа гвалахбыр на ниятбыр кьабыл гьыъырдиш, гьис хьурди ихьды гьу1киметед агьтиетдис эккед четинвалдыбыр гьаса йишийне йикисий.
Гьади, Крымский полуострова, Симферопольди, сыдырмыхьван ешемиш диъий балад хизанбыр урусашды ва мадды халкьмыд, эскерер диъид. Националистеше лап балад фашистешды зулум ваъас йыгара ай миди, да1гьви ивир гьади ад халкьмыд арыма.
Гьадыла РФ-дид кьухьдыбише, Президентед Владимир Владимирович Путинед ихтиярахьван, Крымдид джама1хтид референдум гыргас кюмег гьыъыри. Гьади баласды инсанаше гьухьури — джва1ршис йыгара Россиядихьван сыт1а дикис.
Гьадис гуьре, РФ-дид Президентере эгъеп1ири кьарар — халкьдид ният Россиядид Федеральный Собраниедире кьуле гыргаъ хьур, Россиядид депутаташе ки, сиенибыр сыт1а дишир, РФ-дид Президентед Кьарарас тааликьды «Ий» гьухьури!
18 мартас 2014 сыда Крым ва Севастополь кьабыл хъыъыри, эвельды таарихды йиъидкал, РФ-дид арыди ц1инды кьва1д субъект кал гьа1саба гьыъыри гьабыр.
Баласды Западад гьу1кийметмыс гьа гвалах кьабыл вишир диш, санкциебыр ва правокациебыр гьаъара, Луганскади ва Донецкади да1гьви ивир.
Аммани ихьды гьу1кийметере гъийгъа шывга ки гьаъара а ихьды халкьмыд, ихьды сиенебишды а1гьтиетвалды генеки гуджли ваъара, гьис хьурди е быш дишийне, гьади генеки гьабыр дикиси чалыш мааки ес гудж ваъас.
Гуджлид Россия секкинийис некьихьде ки гьувгур выгад диш, ихьды эскерешды гудж, ихьды халкьмыд савалды, Крым ва Севастополь ки кине, виъи ихьды а1гьтиетвалды ва ихьды сагъвалды.
Гьадыла е-ва1 генеки гьухьур йыгара «Сагъул» е удуху1д эскерешис ва ихьды валает Россиядид кьухьдыбишис. Яхда ад таарихди гьа са ра1хъ виъи – гьа ра1хъ ки, хывкьыр, увуху1ре а!
Б. МЫХАIДЫ
