Дагъыстанад хуIкиметед магьаIлимешды университетед маIхлиди гьаъас йигара а МыхаIд райондид ки таарихед усулахьван беземиш гьыъыр ад джига.
Сергей Алимович Меликова хаIр муниципалитеде тапширмиш гьыъыр ай Дагъыстанад хуIкиметед магьаIлимешды университетед гъаъна маIхлиди сихьяъ хьур джуды таарихес ва мадааниетес лейихене дуьз-дьузгюн гьыъыр ад хаIр джура миллитмыд подворьебыр. МыхаIд райондид подворьедис ки университетед маIхлиди саптыр ай кIепIир ад ер. Мистед сыдыд ахирайикьама гьа гвалах кьуле выгыргасды и хьур, хываI лешур а МыхаIаI дыхьыр ад районди дур-ун ад устарашды бригададире Азизханов Мирзабек не Раджабов Абутдулла кьуле гине.
— Сиене гьа гвалахбыр кьуле йыгыныд сахьусды иштракчи йиъи райондид кьухьды Сулейманов Давуд Амаевич, тангыдид и ва мадды лазимды вы-зыдид дерде ад текды выдж йиъи, мадды меценат я вышга спонсор и куьмег высды яхда адиш. Гьадыла гьанийис ихьды сураа эккед сагъул виъи, ихьды мыслаа иди хъуъ йикIыы гъад фикир-ниятбыр битмиш йикисды чара гьувгур ад. Йе ки я гъад йишидыхъунды замгьаIт сивхьир чалыш диъи райондид кьухьние гьыъыд тапширма дуьзене кьуле гыргас, — гьухьури устараше.
Гьа подворье гьаъара ад са бытIрад ухшер бадана диш ва гьадид бегеде кид-кине гыргасды йиъи джурба-джура иджласбыр мыхаIбишды миллитмыд таарихед гьадат-нубат гьагва гьаъасды, хаIр-джура эвелды пешебыр гьагва гьаъасды, ва ихьды макьамбыр йыхыIсды , нагьнибыр гьаъасды ва шиъирбыр кьыле гьаъасды.
Университетед маIхле фуланды услахьван беземиш выъыр ад кьаIаIрды диш, гьади хаIр дагъыстандид миллитдире джуды таарихес лейихды усул ана беземиш гьыъыр а подворьебыр, гьамыъ гьадикла вишир а гьасад ер, кIыб-кIыб са джигыди ягъмиш даъасды гьа университетед ва мадды университетмыд телебиер, магьаIлимер ва маддыбыр, Дагъыстанад таарих гьацIас йигара ад.

Зарема Исрафилова