Ми йыгъырма МыхаIд райондид кьухьды Сулейманов Давуд Амаевич хаIсил йишир ай сиене районди ад кьылебыр гьыъынмыд идарамыд кьухьдыбишихьван.
Выгыд иджласа хьуъ гетIир ай 8 суал: cахьусды суалад баласды ихтилат йиъий мехьтебырмыра гьаъара ад гьазырваIликла, гыргара ад ремонтад гвалахмыкла, ремонтбыр вахтинди бегьем йишин бадана камды-кесдыдид.
Хьеликана ихтилат гетIир ай сиене документбыр лазим йиъид кал вахтинды дуьз-дьузгюн гьыъыр гьазыр гьыъыр йигадид.
Гьадыла хъуъ МЭШ (Московская электронная школа) программадид гвалах шууна гъилы ливесды ихьды мехьтебырма кьуле эдири иджласад иштракчиер. Ва мехьтебырмыд сайтмыд гвалах ки арыди-джаргыди выгырга, хьур, тапширмиш дыъыри гьабыр Давуд Сулейманова.
Юкьудхьусды хьуъ гетIид суалахьван хуткур ай, шудаъды хынымер мистед сыда хаIр мехьтебе хъидыкьасды, ва 1-хьусды классма шумур хыных кьабыл дыъыр ади хаIсабыр гьыъыри.
Джубрад суалас райондид кьухьние хайиш гьыъыри мехьтебырмыд кьухьдыбишда — мидаа бейдене викисды августад иджласа иштрак гьаъас гьазырвалды ваъ хьур.
Гьадыла хъуъ сиенебишде гьухьури, надзорный гвалах кьуле выгыргад структурамыра ягъаIре ад кал дуьз-дьузгюн гьаъ лазимды документбыр, кьуле гыргаъ гьабише рухьуд гьакьасабыр, налогбыр хъуд йишийне, сиене гъилыхла вахтинды хъехъее, гьухьури райондид кьухьние.
Иджласад ахирес Давуд Амаевич хъацури гьади абише выд суалмыхда ва гьамысды джывабыр хъывыри. Генеки райондид кьухьние тапширмиш дыъыри мехьтебырмыд директорар — вахтинди бегьем гьаъ хьур мехьтебырмыд гьазырвалдыбыр хынимер лаазим йиъид кал кьабыл дыъын бадана 1-хьусды сентябрес. Мехьтебырмыд гьазырваIлид суал контроля лешур а, хьур, республикадид правительствадире, гьа гвалах сиъинбише гюзет выъыр, чалыш хъидиш хьур мадад йыгъырма, ихьды хынимер дыхьын бадана бытIрад классма, ремонт ад мехьтебырма.
Гьадихьван сытIа бегьем вишири иджласад гвалах.

Зарема ИСРАФИЛОВА