Гьавымыкла ихтилат кейихьвна йыггад ихьды инсанахьван, сиъинбише рухьуд ихтилат са йиъи — джалахьуъды гьаваабыр мадиш, гьаваа сен сыдыла дегиш вуруъура а хьус. Инсындис сиене кьадарна йыгара — сигIын, гьугъал, йиз, хьыбыл, гыбыл, амма Элигъание еда хулкардиш, шыв гьаваа мыс викисды.
Дегишвалдыбыр гьекъийкъат гьагвара-гьагвара гьавыдыхда йишир ани йиъи хьус йикиси — хьанна гюзет джаъад йиз лугъур, мыкь вырыхыIре угъвургъара ад емишес, кIыбдид езелмыс. Виригъ гъад йыгъбыр баласды хумухдыхда ва кьыдид сахьусды вазырмыхда хъибхьура, хумухт январяя йыхыIр руъура. Гьугъади, улабас йаькв гьаджагудкал, бедридаа кал гьугъара, зиянбыр гьадис гюре вылцIара рыIкъмыс, езелмыс. Гъиге руъура юхбыр йыдкьыр машинмыд раIхъбыр, ыгъывхара нацIур гъаъ джуды бегмыла батмиш гьыъыр гьадихьван сытIа гьучIелбыр ва сасад джигима езелбыр, багъ-быстанбыр. СигIыд вахтинди лап сиргIара цIай ийир. Ми гьаламатбыр гьавыдид ес ихьды районди ва республикади гьагвадбыр йиъи. Амма са яхда ваъ, юкьсура дуьнйады хъуъдире хъуъ дегишвалдыбыр руъура а гьавымыд сураа. Руъура а дуьнйады эккед сигIын (потепление), рухьура гьаIлимеше.
Урусара рухьура, дуьнйадыхда писды гьаваа вуруъуддиш хьур. Гьекъийкъат йиъине ки гьаса йиъи. Амма мистед гъыIлд ихьды МыхаIд районди гьугълумыд йишир а. Май вазырыла гъийгъады йыхыIр джатIур хаIр хаIфтидис гьугъара а. Са сураа йыха йиъи — гьугъал берекет виъи, рухьура ихьды инсанаше, малдис хьын виъи, кьыIдис гьаIлеIф йиъи.
Амма хаIр кардихда кьадар вишир йыгара, джившийне джетинвалдыбыр руъура инсындис — укь йыхыIд ягъмиш гьаъас джишир сирчере, емиш ва мадды багъди-быстана руъуд карбыр ягъмиш гьаъас, къуру гьаъас джишир гелгара, чIир гьыъыр дюз хъаъад рыIкъмыкла зы хъалгардиш.
Хьура хъуъ йиъид выхадниед йыгъырма маа гьугъалбыр кинийиъи.
Шукур Аллагьахьде, белики август вазыра гьугъалбыр латIур, балагемаа яхда хъивикьас виригъ.
Элигъание выд кал йикиси ва йе ки, гьаса йишийне, Гьанийы разине аъ-гъаъ дыкьас чалыш дикиси.

Б. МыхаIды