Дагъыстан Республикадид кьухьды Сергей Меликов хьаIсил йишир джуду кабинете Магомедов Мухаммадыхьван (Леонардохьван), СВО-дид иштракчиехьван, йигитешды подвиг выъыд даIгьвиед вахтинди, ва гьанийды ниныхьван Шахназ Халиловахьван
Са йыгъа гуджлид даIгьви ад вахтинди россиядид эскерер итхьури бейхабарна украинадид террористешды йыкьаI. Дагъыстанашурад МыхаIд райондады Йирек муIкъаIды эскеред Магомедов Мухаммадды йигитваIлид гьунырдыхьван душманар батмиш дыъыр ва ихьды гадиер гъаъ ихъитхьур. Гьанийис гьагур, душманар чалыш диъид гъараа аа-уу ари эдес ихьды эскерер ва гьади мадана джуда хад ярахахьван батмиш дыъыр душманар, джуды джандыла хыл лювшур.
Кирилл Шульга эскерере сыдыд арыди ахтармиш гьаъара ай, выдж йикIида гехъеръид йигит дух гьилиъне ади.
Гьа арыди дагъыстанашура джуды гъилдаа йишири, гьадид ериндире гьанийис гьыъыр протез.
Сергей Меликова гьыъыри эккед сагъул-варулбыр эскерес гьанийды йигитваIлид гвалахад бадана ва йыгад лазимды кюмегбыр мысга выс хьури шыв къавгъубыр йиширди ки, лечениедис эскеред ва мадды гьанийды хизынди ад джетинды, лаазимды саулмыд бадана.
«Йе эккене шад дишир ай, ихьды дагъыстанабишды инсындире маа джу выдж йигитне гьагва гьыъыр хьур. Йе шад диъи выкалды дух а хьур ва нин ки шад риъи выкалды велед а хьур. Гьекъийкъатды эскер», – гьухьур регионад кьухьние.
Регионад кьухьние къутли выъыр СВО-дид иштракчиед нинис Шахназ Халиловас хизындид Йыгъад байрам.
«Эккед сагъул виъи ваIс выд тербиедид сураа гьасад ухьтанды духарыс, ихьды йигитес.», – гьухьур Сергей Меликова.
Джу Мухаммада хываI халкьардиш, гьасад йигит гвалах выъыр хьур, ва эгер джуда руъура йиъийдин маа гьа йыгъаа хъикьас, маа джу гьасад йигит гвалах ваъасий, гьа йыгъа выъыд калды, йисхьурди гьа бырдж йиъи джуды эскер йиъидыла.
Мухаммадыс ул гий, джуда хъикисдиш хьур ешемиш йикис сиене инсанар ка, ама гъийгъа Мухаммад ешемиш йиъи Дербентди, гвалах ваъара шегьердид военкомата. Гвалахахьван сытIа кьыле ки ваъара а вуза.
Бегедене кюмег выс хьур а Мухаммадыс гъеблид протезед сураа ки. Джус йыгара а хъуънака офицер йикис.
Мухаммад на гьанийды нин дыхьыр ай Сергей Алимовичахда МыхаIд райондид кьухьнийхьван Давуд Сулеймановыхьван сытIа.
Б. МЫХАIДЫ
