Дагъыстана а, са хизанка ка, хьибды диндид инсанар, цIихьиб ерлид халкьбыр ва хьибцIырала балад миллетбыр. Гьадид бала гудж а ихьды гъараады душманашис, чалышды е кьатI даъас. Хабар виъи гьабишис ихьды республикадид уфтанваIликла ки — миди ад варлыд гьадатмыкла, гъеблид ешемиш дикис ермыкла, бытIрад банымыкла, темизды былахмыкла на нацIурмыкла, деръягьакла ва мадды балад джваIршихда адишды уфтанды гьакьасабырмыкла на кардимыкла. Гьадыла и Дагъыстанад таарихе шума иди хылис даIгьвидихьван чалыш дишир ихьды душманар Дагъыстан джваIршис икьрар ваъас. Амма ихьды атабабыйше, джуьхьды гьуIмирбыр сихьир, тарг дыъыр гьасад ният ад душманар, гъигъе выъыр гьадихьван сытIа ихьды савалды.
Западас, Америкадид саталитешис джигара и мисед бытIрад, йыхды халкьбыр ад, ер-юртбыр ад республика кинивиъи хьур Россиядик. Шуунага чалыш диъи ихьды дагъыстанабишды арыди даIгьви-къал ивис, ари лиес ихьды миллетбыр. Гьадид бадана гьабише хардж гьаъара эккед тангабыр, ишлемиш гьаъара гьамыъды интернет ресурсбыр, гьадгус ихьды арыда нераазид инсанар, «кыси» кывхыIс йикисды, манута ул ад, чIирид фикирбыр ад. Гьасабыр цIам диъинекун ки, амма кам диш ихьды арыди. Гьабыр баласды ки диъи джигьил-дживанар, йыхана кьуле адишды Дагъыстанад таарихед.
Амма гьакьасабыр 1999-ды сыдыд, Махачкалди аэропорта йишид, 23 июнас мистед сыда йишид баласды сиене дагъыстанабише кьабыл гьыъыр диш, хыл хыле выр, саваIлихьван дживабыр выр гьамыс, лаазим йишийне, гьуIмирбыр ки сихьир.
Гъийгъа ихьды хуIкиметере даIгьви выгыргади 50-ды хьуIкиметехьван, фашистешды ниятбыр на фикирбыр ад дала-фала ваъас хьур ихьды Россия, гъийгъа ихьды джигьилеше, джуьхьды джан сирхьеди ватан бадана, иштрак гьаъади СВО-ди, гюзет дуруъура гьасад беззетер ки, хъадабцIуд ихьды душманашихда, чалышды йидикне кидишды, кьаIсды инсанар йыдхыIс, дыкьыркьа даъас. Са салааматды, гийкьад, динди ад инсанара, гьагвара аа-уу, иршере сиенебишда, гьаасад езид гвалахбыр, чIирид гьакьасабыр, террактбыр кьабыл гьаъара адиш. Дагъыстанабыр мыс иди гедкьыр а, террористешихда я дин адишды, я са миллитдид дагыстанабишды ил кидишды.
Шыв гьыъыр йыгара, гьасад беззетер цIам дишин бадаана? Гьа суалас дюзгинды джываб хъывыр ай ихьды Дагъыстанад Кьухьние Сергей Меликова джуду халкьдис гьыъыд обращениеди — убур йыхыIр йыгара йыхана джигьилешис вылцIад тербиедис хала диде-нине, мехьтебырма ва гимыма на инсан бала ягъмиш руъуд джигима. Гьабишис угутбыр на ихтилатбыр гьыъыр йыгара ихьды таарихди дишид, ад гъийгъа йигитешикла, джан сирхьере СВО-ди даIгьви выгыргара ад выгъылды духрешикла, нацистешихьван на фашистешихьван. Инаамиш джитшир йыгара юкьсура Дагъыстанад душманаше хаабгъуд фейкмы, чIирид ихтилатмы, джацIад кар хулкара гьыъыр йыгара каIсды, кьухьнийда, сиене гьакьасабырмыд кьуле ад инсанашда.
Е гъийгъа диъине ки са хизан ка диъи аъ-гъаъ, йисхьурди, гьагвара, ми йыгъырма Дербенди шууна дагъыстанабише джатIур йихире лирхьере ади бычIбыр хьибды диндид памятника.
Дагъыстан — ихьды миллитмыд са хизан виъи, Россия хьур хала ешемишды, мысга йигит дюхре ад джигаа йиъи, джуьхды накьудид, атабабыйшды гьадат-нубатмыд кьимет вацIад, хуIрмет ана са-сынийхьван, гьалдына лазимсызна хатир адга джаъара ешемишды. Ва гьадыла чалыш дишир йыгара мидыла хъуъ ки е хырыда хакьас писды гвалахбыр ихьды республикадида, мысга дюзды гвалахмыд Аллагьад рыкъаI дуруъус.
Б. МЫХАIДЫ
