Ислеэнды йыгъа, 4 декабрес, Мыха1д райондид кьухьды Сулейманов Давуд Амаевич джуду кабинете ха1сил йишир ай республикадид «Мыха1бишды ц1инды хабарбыр», «Нур» газетмыд ва ц1ахы1ребишды «Соколенок журналад» баш редакторашихьван Тимур Махмудовахьван, Байрам Абдуллаевахьван, ва Валех Гамзаевахьван. Гьабишила саваенди гьади иштрак гьыъыр ай гьа мыха1бишды на ц1ахыребишды изданиемыд къуллухчийше ки.
Ха1сил дишид арыди райондид кьухьнийхьван агъмиш гьыъыр ай хьуланды суалбыр: Мыха1д райондид экономикадид агьвалат, налогмыд ва сбормыд суал, СВО-ди иштрак гьаъара ад ихьды йигитешды ва гьабишды хизынмыд гьакь-гьасабыр. Гьадыла саваенди баш редактораше хьуъ гет1ир ай ми вазыра виъине ад подписной кампаниядид суал ки.
Давуд Амаевиче неразивалды выъыр выгыргара ад гвалаха сасад идарама районди. Гьанийды ч1елмыхьван, ихьды инсанар гьала гет1кьыр адиш, яни гъаъ мадды вахтбыр йыдкьыр адихьде, ад джетинвалдымыхьде, джала хьуъ ка йыгара сасабишис, шешин джыъыр, дуллух лешус. Гъийгъа девир виъи ц1инды технологиемыд, компьютермыд, эгер вас джац1ара йишийне ц1инды программамыхьван гвалах ваъас, хъыхьыр йыгара гвалахала, анидиъи джигьилер, компьютербыр гьац1ара, гвалах адишды.
Кьиямат районди анийиъи фермерский хозяйствабыр, хакьыр ад навкьбыр, сывбыр, амма налогбыр выс йыгардиш баласдыбишис. Я накьудыла налог вылц1ардиш, я ч1ирила хайир лебшурдиш, къурамат ливир гьамы, гьухьур райондид кьухьние.
Хьуъ гет1идыхъунды гьади суалбыр, гьамыд кьарарбыр асыллы йиъи журналистешила ки, гьухьур ха1сил дишибише. Кьва1дси суруд разива1лихьван йидкьыр мислягьата сиене гвалахбыр гьаъаси савалихьван, хыл хыле выр хьур.
Газетбыр кихьин бадана ц1инды сыдыс кьухьние гьухьур, эгер вы ху1киметед гвалаха гъана йишийне, гийкьыр, хыл йывхы1р йыгара ихьды республикадид газетмыс ки, гьадыла, умуд ваъара, ихьды къуллухчийше ваъ хьур секкиние гьухьусдиш.

З. Магамедова