21-ды октябред йыгъ йиъи Дагыстандид Культурадид не Дагъыстанди ешемишды миллитмыд ч1илмыд Йыгъ. Мистед сыда ки, гьа байрамас гюре, балад идарамыра йыгыр ай мероприятиебыр. Гьа байрамас Мыха1 ад идарамыд къуллухчийше ки бала убур вылц1ара, быт1рана кьуле выгыргара гьа байрам мехьтебырма на садикма ад хынимеше ки джуьхьды магьа1лимешихьван сыт1ана.
Мыха1 ад «Улыбка» хьур дур гъад садикед къуллухчи Исакова Тамила Магомедзагировнара дайраа чалыш ришир, уфтанна агъмиш гьыъыр гьа Йыгъ «Этнокультурное воспитание подрастающего поколения» хьур дур выр выгыд мероприятиедис садике ад хынымешихьван. Гьа гвалах кьуле выгын бадана, гьание к1ыбла хъуъ гьазырвалды ваъара ай. Сабыйды садике ад халыы выгыр ай лейихды усул: йидкьыр сихьир ай кюйнед вахтинды ихьды инсанаше ишлемиш гьаъад къаб-къаджагъ, ха1р джурыдид хын-хыдыч1, масалыс йыхыр ай лейихене кьухьды стэнд, хынимешыы лыъыр ай кюйнед услахьван валыгмар, рышбишды кьулу дыныд шалбыр на генджебыр выр ай, рихьир ай сакалды харыдид парчидыкла ухунбыр, гъилабырмы хылыра рыхыд сукуйбыр лыъыр ай, ва гадийше кьулу лихьир ай бармакбыр, ч1ач1хыйбыр, гъилаба джагварыйбыр ки гъай, лейихене валыгмар лыъыр ай гвалахмыд кьуле гид магъа1лимере ки — Тамила Исаковара. Хьа1ликана гьазыр гьыъыр ай ха1р джурыдид мыха1бишды улесдыбыр. Кьухьды замха1т сивхьир, хынымешис мыха1 ч1илыла ха1р гьыъыр ай нагьнибыр, шиъирбыр, махвбыр, мисалабыр.
Тамила Магомедзагировнара хынимер кьуле эдири, гьис иди нинды ч1ел гъигъене хывкьыр йигад йиъид, гьис иди тарихды гьадат- нубат геджейир йигад йиъиди. Гьание гьухьури хынимешде: «Миллитдихда джуды ч1ел мабдишды, гьа рухьуд ихтилат йиъи, гьасад миллет выдж мабдиш хьур. Гьадыла мыха1 чилыс балана убур выр йигара, ихьды ч1илыла ха1ммише далгыр йигара ва шиъирбыр йик1илана ха1р гьыъыр йигара. Гьадыла саваенды, к1аъла хъуъ мыха1 ч1илыла кихьис ва кьыле гьаъас ха1р гьыъыр йигара».
Бегьем дишида хъуъ, суфрыдыхда садгъур хынемишис кывыри гьазыр гьыъыр ад улесдыбыр, ва гьабишихьван йыхы1ри шикилбыр.
Садикед кьухьды Махмудова Саида Пашаевнара гьыъыри эккед сагъулбыр Тамилас, гьа байрам быт1рана кьуле выгыри хьур.
Зарема Исрафилова
