Дагъыстанды 2016 сыдыла хъуъ лышан гьаъара ка1чIур Дагъыстандид культурадид не чIилды байрамад йыгъ. Гьа йыгъ йиъи 21 октябирес.
Ихьды «МыхаIбишды цIинды хабарбыр» хьур газетере И.Гусейновад дур гъад МыхаIбишды мехьтебехьван сыт1а кьуле выгыр маджлис гьеми байрамас гюре. Гьади ихтилат ай, шууна йе ихьды нинды чIел сувга джывыъыр, ихьды гьаIдатбыр, ихьды культура, гьуIрмет сасынийды арыди ад хывкьыр йигарди.
Ихьды мехьтебед нинды чIилды мегьаIлимере Османова Милана Кардашбалаевнара салам сувгъур йидкьыр ад мийманашы, хынимешы, гьыъыр ихтилат гьание шурад мыхаIбишды гьаIдатмыклаа на ихьды культурадыкла. Гьис йе ихьды нинды чIел йикIиыла убха джывыыр йыгарди.
Баш редактор республикадид газетед «МыхаIбишды цIинды хабарбыр» Тимур Махмудова гьыъыр ихтилатбыр хынимешихьван, шууна йе чалыш дишир йигарди, сытIана сиенебыр нинды чIел бадана. Нинды чIел хъывгад инсындис, джуды дин ки хъыгас, Ватан ки, халкь ки.
Мехьтебед директор Ямудин Таибова сагъулбыр гьыъыр йиркьыр ад мийманас, гьанийды чалышваIлис.
-МыхаIбишды гьаIдатбыр на чIел суджувгур абгын бадана, йе сиене чалыш дишир йигара сытIана,- гьухьур Ямудин Таибова.
Дагъыстан сыт1а бала нациебыр ад республика виъи ихьды Россия гьуIкимете. Ихьды бырдж и, ад гьаIдатбыр на чIел суга джыъын.
Дагъыстандид культурадид не чIилды байрамара инсындыде фикир ваъас вылцIара ихьды чIилды бытIраваIликла. Ихьды бырдж и макъыет дишин культурады, нинды чIилы, гьаIдатмы. Хъуъ хъуд хынимешы, хыдылашы ливкьа выъын ихьды нинды чIел сиенибишды, гъаIр инсындид бырдж йиъи.
Кьухьды урусашды магьаIлим К. Д. Ушинскийере гьухьудкал: «Халкь ешемиш виъи, гьабишды культура на чIел ешемиш виъидийкьама».
21 октябрес ихьды мехьтебе кихьир ай диктант ки мыхаIбишды чIилыла. Гьади иштрак йыгыр ай телебийше не магьаIлимеше. Диретор Ямудин магьаIлимере ки кихьир мыхаIд чIилилад диктант.
Ми маджлисе хынимеше шиъирбыр кьыле гьыъыр йес, ихьды чIилды бытIравалды гьувга выъыр. Гьади хынимеше кьыле гьыъыр шиъирбыр ихьды мыхаIбишды шаирешды: Джамесеб Саларовды, Нурахмед Рамазановды, Гьаджи-Юсуф Меджидовад, Куьр Раджабды Йиреклаады. Гьадыла саваенды гьабише кьыле гьыъыр поговоркабыр на мисалабыр нинды чIилила.
Генеки ихьды нинды чIилыла Ямудин магьаIлимере сиенибишис сагъул-варулбыр гьыъыр. Мисед мероприятиебыр кит-кине гьыъыр йигара хьур, ихьды аала лаъ диъид хынимешис чIел йикIиыла уджубхун бадаана.
Хьели сиене гьади ад магьаIлимешихда, мийманашихда, хынимешихда сес выъыр сухьрудыы мыхаIбишды ха1р джура ямагбыр улес.
Тимур Махмудов
