15-хьусды мартас Мыха1д райондид кьухьды Сулейманов Давуд Амаевич ва Дыгьыстандид Халкьдид Иджласад депутат Абдуллаев Шафи Кафланович сыт1ана дыхьыр ай Эльды К1ат1ры1хъ му1къа1. Гьабыр гьади дыхьыдбыр диъи, бейденекал джывгад писды хабар ившийне — кьва1р ихьды эскер кичмиш дишир, хьур, СВО-ди иштрак гьаъара ад. Гьабише эскерешды хизынмы ва бейдебишы сиене Мыха1д райондид джама1хтид сураа ч1ел-гафбыр гъыъыри ва дыркьыр ад Йигитешихда ра1хмет сивыгыри. Давуд Амаевиче ва Шафи Кафлановиче гьухьури, джва1р кьуле гине сиене лазимды суалмыд дерде дикиси, хьур, гьабишды хизынмыд.
Ихьды дыркьыд Йигитешды дурубыр йиъи:
Гашимов Бекир Багаудинович, гьухуд сен гьанийды йиъи 1987-хьусды. Гьа выдж джуды йик1а1а лувзур йыхьыд йиъи Ватан уву1ху1с хьур, 2023-хьусды сыдыд май вазырыла хъуъ гьание ваъара ай пеше — эскер ине, наводчик йиъий артиллерийский орудиедид.
4-хусды мартас 2026 сыда Добропольский районди Донецкий Народный Республикади йигитне йикьири ихьды эскер;
Махсумов Абакар Гаджимирзаевич, гьухуд сен – 1975-хьусды. 2022 сыдыла хъуъ иштрак гьаъара ад йиъи специальный военный операциеди. Гьанийды звание виъий майор, хьеликана гьа йишир ай командир специальный штурмовой бригададид. 3-хьусды февралес 2026-хьусды сыда Донецкий Народный Республикади ад Полтавка, хьур, му1къа1 йикьири ихьды йигит.
Давуд Сулейманова ва Шафи Абдуллаева гьухьури, гьа Йигитешды дурубыр, ватан бадана джан сихьир, гьакъийкъатды йигитерне дуьнйадыла гьатхы1д, ха1ммыше йик1ыы гъадгаси ихьды халкьдис.

Зарема ИСРАФИЛОВА