6-хьусды мартас Мыха1дид Маданиятад зала агъмиш выъыр ай хьылешды байрам – 8-хьусды мартад Йыгъ. Гьади ягъмиш дишир ай идарамыд къуллухчиер, хьыле, рышба1, мехьтебырма ад телебиер — зал инсанаше ац1ыр ай.
Мыха1д хьылешис ва сиене районди ад хьылешис къутливалдыбыр гьаъас йыдкьыр ай районди ад идарамыд кьухьдыбыр. Са ч1илихьван, гьа йыгъа ад гьаваа гьа1къийкъат байрамад виъий, выг1леше хьылешис, са сынийис къутливалдыбыр гьаъара, сиене шад диъий.
Мыха1д райондид кьухьды, Сулейманов Давуд Амаевиче ягъмиш дишир ад хьылешис хьадид быт1рад байрам къутли выъыри. Гьание генеки йик1ыы лихъийир ягъмишдишибишис 8-хьусды мартад таарих:
— Ху1рметли ихьды хъыдгад хьыле, Ва1с гьеми байрам нубараг виший, сагъ – шад диший, мысга Ва1 шад – гуямишне диший.
Райондид кьухьды гьалгыдыла хъуъ, зала сыкьы1р ад хьылешис байрам къутли выъыри Дыгьыстандид Халкьдид Иджласад депутата Абдуллаев Шафи Кафлановиче. Гьание гьухьури: «Ху1рметли ихьды нинабар, ришиймар ва рышба1! Ва1с сиъинбишис 8-хьусды мартад Йыгъ къутли йиший, Ва1 шад дыъый выхьды хынимеше, хизындире».
Хьели ч1ел лювшур ай Халилов Низам Рахмановиче, гьа йиъи Дагъыстанад савдымыд на промышленностед министр. Гьание гьухьури: «Зы гъийгъа йиркьыр ад йиъи гьеми ма1гьраката (мероприятиеди) салам сувгъус ихьды райондид хьылешы. Гьамыъды хьылеше выг1лешихьван сыт1а иштрак гьаъара а сиене гвалахма — яхда анидиъи дур-ун ад хьыле: магьа1лимер, духтурар, гьа1лимер, ва маддыбыр. Гьадыхьван сыт1а гьабише лаъ-хьуъ гьаъара а дур ихьды райондид ки, республикадид ки. Ху1кийметед гвалахала савае, хьыдыние хал ки уху1ре а. Хьыдылды – халды йик1 йиъи, усул, берекет, хынимешды нин риъи, гьанийыла асыллы йиъи выг1лешды гьунарвалды, шадвалды, шад-гуямишвалды».
Къутливалдыбыр гьыъыдыла хъуъ Давуд Амаевиче идарама гвалахбыр гьаъад балад хьылешис выр ай грамотабыр, благодарственный письмобыр, подарокбыр.
Шафи Кафлановиче джуды сураа чемпионар дишид борецешис — Азизбек Мурсаловыс ва Шамиль Дамуровыс — тангабыр ад конвертбыр выр ай.
Гьадыла хъуъ райондид культурадид Управлениедире йыгыр ай уфтанды концерт. Ихьды хьылешис быт1рад на1гьнибыр гьыъыри дур ад мыха1бишды артистеше. Йыхды на1гьнимыд программадихьван гьади выступать дишир ай Мыха1д музыкальный мехьтебед, Хъылдад искусствадид мехьтебед телебиер ва маддыбыр.
Зарема ИСРАФИЛОВА
