26 февралес «Мыха1бишды ц1инды хабарбыр» газетед редакциеди выгыр ай круглый стол нинды ч1илды Йыгъ агъмиш гьаъас хьур. Гьа ма1гьраката (мероприятие) хьуъ гет1ир ай суалбыр шыв усла ади мыха1бишды ч1ел гъийгъад йыгъа ва шууна викисды гьадид агьвалат геледжек. Редакциедид къуллухчийшыла гъайри гьа ма1гьраката иштрак гьыъыр ай нинды ч1илды кьимет вац1абише: Мыха1д аксакалаше ва мехьтебед кьухьние.
Иджлас ачых выъыр газетед баш редактора Тимур Махмудова. Хьурагине гьание суалбыр выри Мыха1бишды Али Мирзоевад дур гъад 2-хьусды мехьтебед директорас Икрам Давудовас гьац1ара ваъас агьвалат, шууна вылц1ара ади мыха1бишды ч1илды дарсбыр мехьтебе.
Директорад джывабара гьац1ара йишир джетинвалдыбыр районди нинды ч1илды дарсбыр йыгынид сураа мехьтебырма.
«Агьвалат раха1тды диш, — гьухьур Икрам Ибрамовиче. — Дарсмыд плана нинды ч1илис гьагва гьыъыр ад ха1фтиды са сагьа1т йиъи, ва ти ки текды к1аъды начальный классма. Хьудхьусды классала хъуъ гьа сагьа1т кьылебырмыд плана сухъубгура». Кьит диъи мыха1бишды ч1илды магьа1лимер. Чара джившир, кьаъды начальный классмыд магьа1лимеше ха1р хъаваъара мыха1бишды кихьинмыд ч1ел, гыргара переподготовка.
Китабырмыд гьакьасаб хьуланды йиъи. «Китабыр яхда а, амма ц1ам йиъи, ва адбыр ки йисе руъура а. Ц1индыбыр ахъджахара ад бала вахт виъи, — гьухьур Давудова. — Амма гаджадкьы1р сиене джетинвалдымыхда, хынимешис джва1ршис йыгара, кихьис-кагъус нинды ч1илыла, ха1р ваъас мыха1д ч1ел.», — гьухьур директора. Джураана гьание сагъул выъыр газетед коллективес, гьухур, сиене магьа1лимеше кирхьере «Мыха1бишды ц1инды хабарбыр», ва мысга газета лахад мыха1д чилылад дарсбыр, ва мадды нинды ч1илылад материалбыр ишлемиш гьаъара дарсыма. Бегьем руъуди Икрам Давудова умуд кивир, республикади магьа1лимешды институтма ачых хъаъас хьур факультетбыр, отделениебыр мыха1д ч1илды, ва гьадихьван сыт1а гьазыр даъасна магьа1лимер нинды ч1илды дарсбыр высды.
Хьели далгыри сес выъыр йыдкьыд мийманар, Мыха1д аксакалар.
Эскерхан Алиев, му1къа1 дур ад йиъи йыхана эвелды сургара ад ч1елбыр на гьухьалбыр гьац1ад инсан ка. Гьание мисе гьухьур: «Ихьды ч1ел бала варлыд на быт1рад виъи. Гьади анийиъи гьекъийкъат ихьды мыха1бишды ч1елбыр, гьарабашдыбыр диндыхьван йыдкьыд, тюркешдыбыр, сасад ч1елма анийиъи латын ч1илды дибыр ки. Бала а яхда азербайджанабишды ч1елбыр ки, йисхьурди е къумшиер диъидыла…», — гьухьур Эскерхан-шура.
Амани нинды ч1илды бадана ул гид агьвалат ки а: «Ихьды атабабыйшды ч1ел, гьухьун-суал бала темизды йиъий, гьакьды-кьулды йиъий. Гъийгъа балад ч1елбыр сулгара а далгади ишлемиш хъаджаъара. Фикир джывыъыр е гьамыд ериндире ишлемиш гьаъара урус ч1елбыр, гьадыхьван сыт1а балад эвелды ч1елбыр, ихтилатбыр игъибхьура а е далгади, ихьды суьгьбетма.
Гьание эккед кьимет выр выгыргара ад ихьды ч1ел бадана мыха1бишды алимешис, гьабише сивхьид замхы1тдис гъилыы лихъийин бадана мыха1бишды ч1илды кихьин-кагъун (Алисултан Алисултановас, Светлана Махмудовас, Мариза Ибрагимовас — ч1илды профессорашис ва маддыбишис), ва хайиш гьыъыр сиъинбишда: «Дык1а к1ыб-к1ыб далгас халма мыха1д ч1илыла. Мехьтебехъаъ хала хизындире йиъи гъигъды дибыр ч1илды сиргад…»
Джуду мукъу1шурахьван раази йишири Маличаев Мирзамагомед-шу ки. Гьа йиъи СВО-ди ра1хмитдис гьархы1д йигит духарды дид, гьадыла гьанийды иштраквалды круглый стола мааки йыха виъий. Ч1иликла гьалгади гьание гьа кьат1 выъырдиш Ватандикла: «Гьили диширди ки ч1илире и екла мыха1быр даъад. «Мыха1бишды ц1инды хабарбыр» газетере бала лаазимды ва йыхды гвалах выгыргара а, усул хъывгара ихьды нинды ч1илы джалахьуъды быт1рава1лид, йыгъ-йыгъала йыха гьаъара а мыха1бишды ч1илды кихьин-кагъун. Е йик1иыла утха джыъыр йыгара: ч1ел адыйкьама — халкь ки анивиъи.», — гьухьур Мирзамагомед Маличаева.
Ихтилатбыр бегьем руъудаа баш редактора Тимур Махмудова сагъул-варулбыр гьыъыри мийманашис, гьухьур, ч1ел суджувгун бадана чалыш дишир йыгара сиъинбыр ари хана, сыт1а, са газета, мехьтебяа ва ч1илды алимешы лидживир, сиъин халкьдире ч1ел хывкьыр йыгара. Умуд выъыр, мирджед круглый стол кьухьва викис хьур, иштрак гьыъыр мыха1д ч1илды устадаше, алимеше ва джигьилеше.

Б. МЫХАIДЫ