21-хьусды февралед йыгъ йиъи ихьды ху1киймете нинды ч1илды Йыгъ. Дагъыстанди ерлид нинды ц1ихьиб ч1ел а, гьадыла гьа йыгъ дагъыстанабишис байрамад йыгъ кал йиъи.
Сиене джигима ка, гьа байрамад йыгъ агъмиш гьыъыр ай Мыха1д районди ки. Хьичед мехьтебе, Тарлан Фезлиевич Имамгусейновад дур гъад, выгыр ай уфтанды ма1гьракат. Гьа ма1гьракатас гьазырвалдыбыр гьаъас, сиене гвалахбыр быт1рана арыди-джаргыди гыргас йыхана чалыш дишир ай ЦБС-дид къуллухчиер, мехьтебед дирекция не магьа1лимер ва «Мыха1бишды ц1инды хабарбыр» газетед редакция. Балад гвалахбыр гьыъыри райондид библиотекамыд системадид кьухьние Салманова Индира-ришире джуды къуллухчийшихьван сыт1а. Йыхана йыдкьыд мийманар кьабыл дыъыри мехьтебед кьухьние Гаджиева Рукият Абдулманафовнара.
Гьа йыгъа гьади гене иштрак гьыъыр ай райондид телевидениедид оператора Насир Юсуфова, райондид Управлениедид кьухьды Саид Сулейманова, хьичебишды кьа1сды-кьухьды хьылеше ва мадды му1къу1д инсанаше. Сахьусды ма1гьракатад ху1рметли иштракчи йиъий сес выъыр сиене ягъмишдишибишихьван ха1сил йикис йыркьыд хьичебишды акъсакъал ва дур ад шаир Гусейнов Саид Султанович.
Уфтанна лывт1а выъыр ай мыха1бишды шаирехьван ха1сил дикисды класс-кабинет ки — масалмыхда хъуй нинды ч1илылад шиъирбыр кид плакатбыр, мыха1бишды хын-хыдыч1быр, эвелды гедене хала, гвалахмы ишлемиш гьаъад карбыр. Уст1ул ки йыхана беземиш выъыр ай лихьир шаиред китабыр ва улед-рагъад идды карбыр.
Гусейнов Саид шаирехьванды встречады к1еъ лийир Индира-ришире. Гьание ягъмишдишибишис джыка1не йик1ыы лихъийир нинды ч1илды Йыгъад таарих, таныш дыъыр шаиред биографиедыхьван, гьанийды районди хъиркьыдыла хъуъ игъитхьуд китабырмыхьван «К1аъды мыхра кьухьды йик1» («В маленькой груди большое сердце») мыха1д чилыла кихьир ад ва «Ифенвай симер» («Натянутые струны») йырг ч1илылад.
Джыка1не ихтилат гьыъыри шаирды шиъирмыкла, шыв къавгъу-дердибыр, гьакьасабыр гьагва гьыъыр ади джуды шиъирма авторара.
Хьели ч1ел выри мехьтебед директор Гаджиева Рукиятда. Гьание гьухьур, нинабар, дидабар хала ва мехьтебе магьа1лимер ки к1ыб-к1ыб далгыр йыгара хынимешихьван нинды ч1илыла, гьа увуху1р йыгара, т1авалхъа джывыъыр мадды ч1илмыхьван, чалыш дишир темизне далгас, джаала хьуъ ихьды атабабыер далгад ка.
Хьели уфтанна «Нинды ч1ел»-хьур шиъир кьыле выъыр 9-хьусды класса ад С. Гаджиевара. Гене гьанийыла хъуъ мыха1бишды шиъирбыр кьыле гьыъыр мадды к1аъды классма ад хынимеше ки — А. Гаджиевара, А. Салмановара, Я. Абдулкеримовара, А. Гаджиева, А. Курбанова ва маддыбише.
Сагъулбыр гьаъади джуьхьды шаирес магьа1лим Абдулкеримова Чичеке гьухьур, джва1рше мысга сес ваъара, хьур, Саид-шухда классный часма, «Разговоры о важном»-хьур встречама.
Саркарова Айша-ришире, ешди ад, шаирес къутли выъыр бегедене агъмиш выъыд 90-ды сыдыд юбилей, сагъулбыр гьыъыр аалалаъ диъид джигьилешис вылц1ад угутмыс гюре джуды шиъирмыхьван. Шаирес гене сагъулбыр гьыъыр джигьил хьичешура Фахрудин Ширинова.
Шудаъ варлыд виъиди мыха1бишды ч1ел, мыс йиширди гьадыхда алфавит, кихьин-кагъун, ихтилатбыр гьыъыри гьади абишис Байрамбек Магомедова. Гьание гене ки дирзир ихьды профессорар Алисултан Алисултанов, Светлана Махмудова ва мадды алимер, эккед замха1т сивхьид мыха1д ч1илды кихьинмыс йа1кв гьагва гьыъыд. Маданиетдид Управлениедид кьухьды Сулейманов Саиде таныш дыъыр гьади абыр шаиред бегедене игъитхьуд ц1инды китабахьван «Хъуьлуьдрин гъед» («Звезда Хлюта») ихьды Хъылдад Йигитекла Магомеджанов Магомедаликлады. Гьадис гюре культурадид къуллухчиере Сабуева Заремара кьыле выъыр шиъир «Фулфанад дух — Россиядид Герой»-хьер.
Гаджиева Рукията бала йыхана кьыле выъыр «Киче»-хьур Саид-шуд шиъир, гьагва гьыъыр, шууна йыхана джуды к1аъды ватан хъывгарди шаирес.
Встреча бегьем руъуда шаирес райондид ЦБС-дид ва редакциедид суруула Индирара пешкеш гьыъыр ай быт1рад карбыр, къисмат гьыъыр гьанийис сагъды джан, къутли выъыр сивид ваз, шадвалды, да1гьви к1ыб ка бегьем вишир.
Эккене разине ихьды шаире Саид Султановиче сагъул-варулбыр гьыъыр сиене иштракчийшис, чалышдишибишис выдж бадана, джуды шиъирмыд китабыр игъиес куьмег выдбишис ва къутли выъыр сиъинбишис Рамаданад ваз.
Б. МЫХАIДЫ
