9-хьусды декабред йыгъ йиъи Ватандид Йигитешды Йыгъ.
Гъийгъа е сиенебише артухана йик1ыы дыгыри ихьды Ватан душманакла ти гедене азад ваъас да1гьвие дыхьыд йигитер. Ва гьемиса1гьатди ки, хыле ярах хана, джуьхьды кьухды дидабар-кал йигитерне люздир ад Ватан бадана СВО-ди иштрак гьаъара ад джигьилер йик1ыы дыгыри.
Сиене халкьдире, гьабишды нинабаше, къариймаше, ришиймаше, хынимеше йыгъ-йыгъа лирхьере кьыле гьаъара, гюзет ваъара а — да1гьви лабт1ур а хьудид ва ихьды Йигитер гъаалиб дишир, хала хъит1ина а хьудид шадды хабар викис, хьур. Гьабишды йик1икла саъ эбир кувгъу1ре, йыгъ-выш фикир ваъара а гьади шууды а1гъвалат ади, хьур. Гьа1р инсан гийкьара ани йиъи, шудаъ кьухьды гьунар йиъиди Ватан уву1ху1нид за1хмет, ва гьадыла йик1идана сагъул рухьура ихьды эскерешде.
Е сиенебыр, шад-гуямиш дишири гьеми йыгъырма хабар ившийне, мыха1шурас Рагимов Гаджимурад Ниямудиновичис гене са награда выр а, хьур. Гьанийис выр ани йиъи «Герой СВО»- хьур медаль. Гьа награда сахьусды диш Гаджимурадыс выр ад, мидыла улихьде ки гьанийис выр ай орден Мужества.
Сиене халкьдире ва сиъинбишихьван сыт1а ихьды редакциедид къуллухчийше ки ваъара къутли Гаджимурадыс лювшур ад кьухьды награда.
Къисмат йиший джус сагъна-саламатна халы, хизынды хъикьас джуды юлдашешихьван сыт1а, душмана гъаалиб дишир.

Зарема Исрафилова