Дагъыстандид кьухьды Сергей Меликов гьалгыр ай гвалах бадана дыркьыд журналистер йик1ыы дыгыргад Йыгъ гюзет гьыъыр.
«15 декабрес ихьды ху1киймете йиъи гвалах бадана дыркьыд журналистер йик1ыы дыгыргад Йыгъ. Гьа Йыгъ гихьид йиъи Россиедид журналистешды Союзад хайишехьван 1991-хьусды сыда журналистеше сивхьид за1мха1т, ва гьабише выъыд йигитвалды да1гьвиед йыкьды-йыкьа1 дыхьыр, ц1ыед йыкьа1 а1ч1ур, гьади ад агьвалатад хабарбыр халкьды лийкьа гьыъынид бадана.
Гьа хаджалатад яц1ак 100-дыхъунды дур кини йиъи. Ес йик1ила утхас диш ихьды Магомедсалих Гусаев не Загир Арухов. Гьабише 1990-хьусды ва 2000-хьусды сыдырма кьухьвалды ваъара ай биса1гьтди вишир ад Дагъыстандид халкьдид политикадид не динмыд гвалахмыд министерствади. Гьа вахтинды, гьухьус йикиси, гьабыр ки  да1гьвиед йыкьа1 ай, гьис хьурди гьабише хьуъ аджагъур ай экстремизмадид не сепаратизмадид лазимсызды идеологиябыр. Республикадид массмедиамыра гьа гедене бала кьухьды замха1т сивхьири, гьувгад билидыда Дагъыстан гъари ваъас, хьур, джигьилешде ахмакьды рыкъы1 гъил лихьис джывыс хьур. Амма гьа да1гьвиди джуьхьды гьу1мирбыр пыч йишири. 2011-хьусды сыда инсафсыз залымаше йыхы1р кагъури Гарун Курбанов. Гьа бала кьухьды баджарыхбыр ад инсан йиъий, гьа гьа1лим ки йиъий, кьул-кьулук кид журналист ки йиъий, ва лазим йиъид кал гвалах кьуле выгыргад регьбер ки йиъий.
Амма журналистешды пеше раха1т садаки вишид диш ва ха1ммише а1хиетвалды гюзет выъыр йигад гвалах виъи. Гьемисагьа1тдики гьа пеше ваъадбыр, джандыла хыл лювшур анидиъи да1гьвибыр ад джигыма. Журналистер анидиъи специальный военный операция гыргара ад зонади ки. Гьабише гьади ад агьвалатад дуьзды хабарбыр лийкьа гьаъара е-ва1шы. Гьабишик кинидиъи журналистер джуьхьды гьа1шкьахьван гьадиъ дыхьыр ад эскерерне. Джанде кьухьды йик1 ад, гиджич1ед, Дагъыстандады военкорашды гьунырдире гьадады хабарбыр я йиъид кал лийкьара а.
Гвалахад рыкъа1 дыркьыд журналистер, операторар корреспондентер ес ха1ммише йик1ыы гъадгаси»,- гьухьури Дагъыстандид кьухьние.

Зарема Исрафилова