Дагъыстан Республикади Новолакский района «Росатомат» хьыблихьван тук вылц1ад станциедире гвалах ваъара кувч1ур а. Сахьусды этапа гвалах ваъасды йиъи 61-ди установкадире сиене сыт1а высды 152,5 МВт.
Кьва1дхьусды этапа 2026 сыда гъилы лийисды йиъи гене 59 установка, вылц1ад 147,5 МВт. Кьва1дхьусды этапала хъуъ гьа хьыблид парк лап эккед руъура Россияди.
Сиене мощность ветроэлектростанциедид йикиси 300 МВт. Сыдыд арыди плындихьван гьадире выси 879 млн кВт.ч.
«Новолакская ВЭС “Росатома” – гьа йиъи гьамыъды ва зиян кидишды тукад объект Дагъыстан Республикади. Йик1ыы гъабгасды гвалах виъи, ц1инды регион Россиядид госкорпарациедид картадик кипхьуд йыгъа “Росатомад” йишир ай 18 сен.
«Йыгъ йыгъала Россиядид инсанашды яшайиш йыха гьыъын – сахьусды ният йиъи ихьды гвалахад. Гьац1ара, Новолакский ВЭС-ре эккед хайир выси регионад топливно-энергетический комплексед гвалахас, лаъ-хьуъ гыргаси экономика ва Дагъыстанад инсанашды яшайиш мааки йыха гьаъаси. Е сагъулбыр гьаъара республикадид кьухьдыбишис ва тукмыд Министерствадис куьмег выр хыл-худ йывхы1нис гюре проект кьуле гыргади», – гьухьур АО «Росатом Возобновляемая энергия»-хьур идарадид генеральный директора Григорий Назарова.
«Дагъыстан Республикадире йыгъ-йыгъала лаъ выгыргара а тукмыд махкамвалды, йыха гьаъара гьадихьван сыт1а регионад инсанашды яшайиш. Ихьды республикадихда а эккед кьуве гъилы лиере ад ц1инды тукад проектбыр кьуле гыргасды. Ва мисед проектмыра, луза гьаъара ад «Росатомад» хьыблид парк-калды, зиянбыр высдиш темизды гьавыдис ва ухьтанды природадис Дагъыстанад. Гьадыла саваенди ачых йикиси ц1инды гвалахмыд ербыр. Меселла, хьыблид паркара гвалах ваъад вахтинди гвалаха дикиси 70 къуллухчи. Хъуънака ес йик1ыы гъа мааки бала гьаъас региона хьыблид тукмыд мощностьбыр», – гьухьур Дагъыстан Республикадид Правительствадид Седриед сахьусды заместителе Манвел Мажонца.
Журналистешис джывабыр вылц1ади АО «Росатом Возобновляемая энергия»-хьур идарадид генеральный директора Григорий Назарова гьухьур, Волгодонскади «Атоммаш» завода агъахара а ступицабыр, гондолабыр, генераторбыр ва установкабыр мыкьа хъаъад системабыр. Композитный дивизионара «Росатомад» сигыр ай сиене лазимне гъийкьасды лопастьбыр хьыблид установкабыр луза гьаъас сахьусды хылис Новолакский ВЭС-дис ва кьа1ч1ур а сиргара кьва1дхьусды этапас ки.
Б. МЫХАIДЫ
