Дагъыстан маа кипхьур а сахьусды хьура гид регионмык, куьмег сиргад специальный военный операциедид зонади ад эскерешис. Гьа хабар выъыр ай джуды официальный телеграм-канала регионад Кьухьние Сергей Меликова.
Эккед кьухьды партие лазимды бардид ливкьа выъыр ай эскерешы. Выъыр ад хабардихьван, куьмег сыт1а гьыъыр ай гюзет гьыъыр сахьусды лазимды карбыр, эскерешыхда йишин бадана сиене гьакьасабыр, раха1т гьаъасды гьабишис кьуле гыргас йыхана джуьхьды да1гьвидид гвалахбыр. Ми партия ягъмиш ваъади йыхана иштрак гьыъыр ай Кизилюртады, Избербашдады ва Ахтынский райондады инсанаше.
Ягъмиш гьыъыр ай – сиг1ыд валыг-чалыг, генераторбыр, бензопилабыр, сваркабыр гьаъад аппаратбыр ва балад мадды карбыр. Джураана быт1рад усул выгыр ай дур ад юкьсура гьахтыбишды эчирмыра, сигыр ад ерлид багъманчийше салам хьурмадинере к1аъды ватандылад.
«Ми партия сивыгыр ад виъи эскерешис джураана гьазыр гьаъара ад беспилотный системамыд полкад, гьади анийиъи ихьды танкист Марат Халиков ки.
Маа гьаъас йыгара эккед сагъул-варулбыр сиъинбишис, гьал куьмег вырди ягъмиш гьаъас ми карбыр, сиъинбишис, гьалыс гьабыр сигыр ади, – ихьды йигитеше ка ватан уву1ху1бишис. Сагъул генеки ихьды сава1лис ва е шад даъара ад гадийшис», – гьухьур Сергей Меликова.

Б. МЫХАIДЫ