Кьабыл гьыъыр а кьарар 20 октябряла 10 ноября йыхы1р 2025 сыда Дагъыстан Республикадид выплата контракт кит1ибишис РФ-дид Вооруженный Силамыхьван лаъ хъаъас хьур 2 млн манутмы йыкьама (резервадид полкала хьуъ). Гьадыхьван сыт1а гюзет гьыъыр федеральный (400 гьагъзыр манут) ва муниципальный (100-ла 500 гьагъзыра йыхы1р манутбыр) выплатамыд сиене сыт1а единовременный сумма, лювшусды инсанара контракт кит1ийне, викиси 2,5 — 2,9 млн манутбыр.
Дагъыстанад Кьухьние джуду telegram-канала выъыд хабардихьван, бегедене Международный дискуссионный «Валдай»-хьур клубад иджласа Россиядид Президенте Владимир Путине гьухьур ай, юкьсура да1гьви ад джигиди ихьды къушумбыр луджузур хьуъдире хьуъ йиъине а.
«Сиене подразделенияма анидиъи эскерер-дагъыстанабыр, джат1ур зас хъу1гъу1ре благодарственный кагъатбыр гьа гадийшды командирешды, – гьухьур РД-над Кьухьние. – Е шад диъи яхда а хьур 15 Россиядид Йигитер, гене 13,5 гьагъзыр ихьды эскер, лешур ад ха1рса джура ху1кийметед наградабыр. Ха1рдид гьамыд йыкьа1хда хъунивиъи йигитвалды. Сасадбише уфтанна кьуле выгыр а джуды боевой задача, сасадбише кюмег выр ай джюхьды да1гьвиди ад юлдашешис яраллы дишийне ва яки гьади ешемишды инсанашис, сасадбише джуу лювшур а ответственность лап джетинды вахтинди».
«Кюмег выр хыл-худ йывхы1н бадана гьасабишис, гьал Ватан уву1хусды ра1хъ кеп1ирди, ва мааки гуджли йишин бадана ихьды къушумбыр, е эгъет1ир кьарар лаъ хъаъасды регионара вылц1ад контрактникешис единовременный выплата 2 млн манутмы йыгыр. Гьа тангабыр лешус йикиси инсанашда, контракт кит1ид 20 октябряла хъуъ.
Ихьды йигитешис гьац1ыр йыгара: е джва1ршихьван диъид, ихьды умуд кид джва1ршик ва гьац1ад, ха1р са т1екьикьедире джуьхьды армидид бегеде ваъара а ихьды гъаалибвалды. Ва е ки мысга кюмег выс сиъинбишис – ва гьамыъ да1гьвиед кеэ гидбишис ки, ва гьабишды гьунарвалдыбыр гюзет гьыъыр эгъет1идбишис джуды кьарар гьабишихьван сыт1а Ватан защищать ваъасды, ва сиъинбишис, выш джуды долг кьуле йыгыр хала хъиркьыр ади», – гьухьур регионад Кьухьние.
Сергей Меликова йик1ыы лихъийир, гъийгъа Дагъыстанди гвалах ваъара а 26 джура ху1кийметед кюмгид мерамыра ва яшайишдид гарантиемыд эскерешис ва гьабишды хизынмыс. Кюмег вылц1ара а юкьсура – больницамыла на хынимешды кьылевыъынмыла йыхы1р накьумыд ербыр выны йыкьама.
«Эккене джурад убур рыхы1ре а е “Доблесть гор”-хьур программадис, выъыр ад СВО-дид иштракчийшис не ветеранашис. Миди эскереше ха1р ваъара а кьухьвалдымыд гвалах наставникешихьван сыт1а. Гьабишды гьунарбыр, йигитвалдыбыр балана ягъа1ре а гьамыъды вахтиндире.
Гьелбетдики, гвалах джат1ур выгыргаси мидыла хъуъ ки. Результатмыд итогбыр кюмег вынид инсанашис, гьал кит1ирды контракт Россиядид Вооруженный Силамыхьван, гыргаси 10 ноябрес ва кьабыл гьаъас кьарар гьадыла хъуъ выгыргасды гвалахад.
Да1гьвиед хьура гибишис йыхды карбыр къисмат йиший! Ихьды Верховный Главнокомандующиере гьухьудкал, яхда правда хъу, правда – гудж виъи, гьадыла Гъаалибвалды ки ихьды викиси!», – гьухьур Сергей Меликова.
Б. МЫХАIДЫ
